روايه تجننن للكا تبه ظنوون

.


في الصالة عقب ما هدت ليلى وغسلت ويهها سارت ويلست ويا يدوتها وخبرتها انه سهيل بييهم وانه يباها في موضوع.. ويلسن في الصالة هن الثلاث يترينه.. ليلى وموزة وأم أحمد.. وعقب ساعة تقريبا ياهم سهيل وشكله صدق تعبان وسار الميلس.. وعقب ما سلمت عليه أم أحمد وتخبرته عن ولدها ، وسلمت عليه ليلى اللي دشت الميلس ويا موزة.. قال لهم سهيل: " يا ليلى يا بنتي أنا ياينج هني أباج تساعديني.. انتي تعرفين انه عبدالله ما عنده شريك وما عنده حتى نائب ينوب عنه في الحالات اللي مثل هاذي.. و لين ما يقوم بالسلامة ان شاء الله ما يستوي تتعطل اشغاله ومشاريعه.. ومستحيل نبند الشركة.. "


ليلى: " أكييد.."


سهيل: "عمج طول عمره وهو ملتزم بمشاريعه ويسلمهن لأصحابهن في الوقت المحدد لهن بالضبط.. وهو ريال يعرف يمسك شركته ويدير حلاله.. ويعرف منو يطرش لموقع البناء والموظفين كلهم يخافون منه ويحترمونه.."


ابتسمت له ليلى ونزلت عيونها بحزن..


سهيل: " أنا بدش في الموضوع على طول.. أنا استوى لي اسبوع بحاله احاول اضبط هالشركة ومب رايم.. أنا مهما حاولت بتم محامي وما اعرف للتجارة ولا للمقاولات.. والموظفين محد منهم مهتم بالشغل.. عشان جي أباج تتصلين بمحمد وتخلينه يرد البلاد ويمسك الشركة ويايه.. مابا اللي بناه عمج في سنين طويلة ينهد في هاليومين اللي غاب فيهن عن الشركة.."


أم أحمد: " بس محمد مرتبط هناك ويا مرته ما يروم يودرها.. مرته تتعالج هناك.."


سهيل: " وأنا ما اروم امسك الشركة بروحي.. باجر لازم اسير راس الخيمة اشوف شو مشكلة المهندسين ويا العمال.. والشركة بتم جي محد فيها.. والمحاسبين ما ينوثق فيهم محد يخليهم ارواحهم..هذا غير باجي الموظفين اللي من الساعة 11 يروحون بيوتهم.."


موزة (اللي كانت طول الوقت ساكتة رمست بتردد وهي تطالع ليلى بطرف عينها): "انزين ابويه... اممم.. مب ربيعك .. اممم. .شو اسمه؟؟ اللي كان وياكم في الشركة؟ هييه !! مبارك!!.. "


اطالعتها ليلى بنظرة وكملت موزة بجرأة..: "ليش ما تخلي مبارك يساعدك ويمسك الشركة وياك؟"


سهيل: "مبارك عنده شركته ومشاريعه وما اظن يفضى لنا نحن.. بس محمد هو الحل.. اتصلوا به وشوفوا يمكن يروم يرد البلاد.."


في هاللحظة رمست ليلى بحزم وقالت: " بحاول اقنع محمد يأجل علاج مريم.. وعن مبارك نحن مب محتاجينه في الشركة.. أذكر انه عمي عبدالله قال لي مرة انه هو اللي طلب يفض الشراكة اللي من بينهم.."


سهيل: "هييه.."


ليلى: "خلاص عيل ليش نلجأ له الحين؟؟.. "


موزة اطالعت ليلى بحقد بس ليلى ما اهتمت وكملت كلامها: " عمي سهيل انته سير باجر راس الخيمة ولا تحاتي شي.. وأنا بسير عند روان في الشركة وبيلس وياها وبخليها اطرش حد يلف ع الموظفين كلهم ويتأكد من وجودهم في مكاتبهم.. وبراجع وياها الملفات.. أحيد عمي عبدالله قبل لا يعرس كان اييب ملفاته بيتنا يوم الجمعة ويخليني اشتغل وياه.. يعني يمكن افهم شوي في هالسوالف.."


أم أحمد: "لا لا ماله داعي تسيرين الشركة .. وتدخلين عمرج بين الرياييل.. عمج ما بيرضى بهالشي.."


ليلى: " وعمي بعد ما بيرضى انه يقوم بالسلامة ويشوف شركته منهارة.. وبعدين يدوه انا بس باجر بسير وبشوف شو الوضع في الشركة.. ع الاقل عشان يوم ارمس محمد اعرف اقنعه.."


موزة: "ومريم؟"


ليلى:" مريم علاجها ممكن يتأجل لأي وقت ثاني.. ونحن محتاجين محمد الحين.."


سهيل: " خلاص يا ليلى انا باجر الصبح بخبر روان انج بتمرين عليها.. وعقبها بسير راس الخيمة اشوف المشروع هناك.. واذا شفتي عمرج مب مرتاحة ردي البيت على طول"


ليلى: " إن شاء الله عمي .."


يلس سهيل يتفق وياها على شوية شغلات وعقب خذ بنته وروحوا.. وتمت ليلى يالسة ساعة في الصالة ويا يدوتها تحاول تقنعها انه اللي بتسويه هو الصح.. وفي النهاية سارت ام احمد ترقد وهي زعلانة على ليلى ودشت ليلى الغرفة اللي حذال غرفة يدوتها واللي ترقد فيها من يوم يابوا لها شمسة.. ويابت شمسة من غرفة يدوتها ورقدتها على السرير اللي حذال شبريتها..


كانت متظايجة لأنه يدوتها زعلت عليها.. بس بعد كانت تحس انها لازم تسوي هالشي عشان عمها.. لازم توقف وياه وتساعده.. وفي يوم من الايام بتفهم يدوتها انه اللي بتسويه ليلى هو الصح


.


.
.


فوق.. في الطابق الأول.. الكل كان راقد إلا سارة..


كانت لابسة شيلة الصلاة ويالسة على شبرية أمها وابوها تقرا قرآن .. وعقب ما خلصت رفعت إيدها فوق وابتدت تدعي ربها..


" يارب.. يا مجيب الدعوات.. إشفي عمي عبدالله عشان يرد البيت ويطلع من المستشفى.. يا رب لا تخلي عمي يموت لأنه ما عندنا عم غيره .. وأنا ما اباه يموووت.. عمي عبدالله وايد طيب وانا احبه.. يا رب تشفيه .. ويرد.. ويعيش ويانا هني.. آاااااااااامين.."


وعقب ما خلصت انتبهت انه أمل واقفة عند الباب توايج عليها.. ويوم اطالعتها سارة قالت أمل: "إنتي هني؟"


سارة: "هييه.."


أمل: "شو تسوين؟؟"


سارة: "ادعي لعمي عبدالله عشان يرد البيت.."


أمل:" عادي ادعي له اانا؟"


سارة: "هييه بس يدوه تقول لازم تقرين قرآن قبل.."


أمل وهي تدخل الغرفة وتوقف عند الشبرية: "هييه انا حافظة قرآن.."


سارة: " تعالي ايلسي هني.. واقري قرأن وادعي له يرد البيت.."


أمل: "صبري بييب لي شيلة.."


سارة: " شي هني في الكبت.."


سارت أمل وطلعت لها شيلة صلاة وتحجبت عدل ويلست حذال اختها ..


واستمرت دعوات هالطفلتين لفترة من الزمن.. وبالتحديد نص ساعة.. قبل لا يستسلمن اثنيناتهن للرقاد على شبرية أمهن الله يرحمها..


.


.


نهاية الجزء السادس والعشرون




الجزء السابع والعشرين



.


.


في فترة من فترات العمر، تحس انه حياتك تجمدت عند لحظة معينة.. لحظة تستغنى فيها عن حياتك الخاصة وتبدا تعيش حياة الأشخاص اللي حواليك.. أحلامك اللي عشت وانته تبنيها تتهدم في لحظة وتتحول لجريمة ما تتجرأ انك تفكر مجرد التفكير في تحقيقها .. في فترة من فترات العمر، يتساوى عندك الماضي والحاضر والمستقبل، وتضيع حياتك في زحمة الأيام والشهور والسنوات.. وما تحس بعمرك إلا وانته منغمس في روتين كئيب محوره انه كل اللي حواليك بدوا يتغيرون وانته بعدك على نفس حالتك..


في لحظة من لحظات العمر.. بتم مستلقي على فراشك عقب ليلة طويلة من الأرق وانته تفكر وتعيد حساباتك مثل ما كانت ليلى تعيد حساباتها في هاللحظة.. وهي متمددة على فراشها الساعة خمس الفير..


كانت تفكر بحياتها.. بطفولتها ومراهقتها.. بالأيام الحلوة.. أيام ما كانوا أمها وأبوها وياها في كل خطوة تخطيها.. هاييج الأيام كانت متأكدة انهم بيتمون وياها للأبد.. كانت تسير المدرسة كل يوم الصبح وهي تعرف انها بترد وبتحصل امها يالسة تزهب لهم الغدا.. وبتجوف ابوها ياي من المكتب ويايب لهم وياه آيس كريم هي ومحمد ومايد.. كانت ليلى طفلة وببراءة الاطفال كانت تحلم انها تكبر وتصير مدرسة تربية فنية.. أو انها تتزوج ويكون عندها عيال.. وكبرت وهالحلم في بالها.. ما كانت تعرف انه مجرى حياتها بيتغير وانه الأيام ممكن تكشر عن أنيابها لها في أي لحظة وتخذلها..


مسحت ليلى على شعر خالد اللي كان راقد حذالها على الشبرية والتفتت تطمن على شمسة اللي كانت راقدة في السرير الصغير اللي حذال شبريتها وتنهدت وهي تستعيد شريط ذكرياتها وكأنها تتلذذ بتعذيب نفسها.. كانت صغيرة.. عمرها كان 9 او 10 سنوات تقريبا.. وكانت في حديقة بيتهم الساعة ست ونص الصبح ويا محمد .. كانوا يدفنون شي تحت شجرة الزيتون اللي عند النافورة.. شو اللي كانوا يدفنونه؟ حاولت ليلى تتذكر ورصت على عيونها حيل وكأن هالشي بيخلي الذكرى توضح في بالها.. بس ما رامت تتذكر اللي دفنوه.. المهم انه كان شي وكانت ليلى مقتنعة انه "كنز" وانهم بيردون يحفرون في هالبقعة عقب سنين طويلة وبيطلعون كنزهم هي ومحمد.. تتذكر أبوها اللي كان توه ياي من برى تعبان لأنه كان يركض كل يوم عقب صلاة الفير ويوم جافهم يا ويلس حذالهم ع الارض في الحديقة وسأل ليلى: " شو عندكم هني؟"


اطالعته ليلى اللي كان ويهها كله رمل وقالت له بفخر: "كنز.."


ما تتذكر ليلى ملامحه ساعتها واذا ضحك ولا لاء.. بس تتذكر انه بطل الصندوق اللي بيدفنونه عشان يجوف الكنز.. هني تذكرت ليلى شو اللي كان داخل الصندوق.. كانت صورة جماعية مصورينها في المستشفى عقب ولادة مايد اللي كان عمره يومها سنتين.. وكانت ليلى تموت في هالصورة لأنها كانت يالسة في حظن أبوها وتطالعه وهي تبتسم.. وأبوها بدل لا يطالع المصور كان يطالعها ويرد لها الابتسامة..


تتذكر ليلى انه أبوها دفن الكنز وياهم وحط عليه حصاة صغيرة علامة عشان يعرفون مكانه عقب وشل ليلى بإيده اليمين ومحمد بإيده اليسار ودش وياهم الصالة عشان يتريقون .. كانت هاذيج طفولتها هي.. عاشتها بكل تفاصيلها وبكل لحظاتها الحلوة..


انجلب خالد واقترب من ليلى وخلاها ترد للواقع المر اللي عايشتنه.. مسكين خالد.. ومسكينة أمل وسارة.. ليلى تمتلك الشي اللي عمرهم ما بيمتلكونه.. ذكريات أمها وأبوها اللي تقدر تستحضرها في أي لحظة تباها.. يمكن هالشي احسن لهم.. ع الاقل هالذكريات ما بتعذبهم شرات ما كانت معذبتنها هي.. تنهدت ليلى بعمق.. ذكرياتها لازم اتم في الماضي وبس.. المفروض ما تلوثها بالحاضر اللي تعيش فيه.. كانت تعرف انه الذكريات اذا اختلطت بالواقع بتفقد كل شي حلو فيها..


نشت ليلى من فراشها وسارت صوب بلكونتها الصغيرة وبطلت الباب ويلست تطالع الشمس اللي ابتدت ترتفع في السما.. كانت مب فاهمة حياتها.. ما تعرف إذا كانت قراراتها صح ولا لاء.. قبل أربع سنوات، كانت صغيرة .. حياتها عبارة عن طوفان من الاحلام الكبيرة اللي بتحققها ويا حميد.. والحين.. كل شي تلخبط.. تحولت ليلى لإنسانة ثانية.. الحياة تتسرب منها شوي شوي.. والملل والمسئوليات بدوا يطغون على جوانب شخصيتها.. يمكن عشان جي كانت حاسة بالإثارة.. حاسة بإن الحياة بدت تتدفق في شرايينها من اللحظة اللي خبرت فيها سهيل انها بتسير شركة عمها وبتحاول ترتب الأمور هناك.. إثارة غبية كانت تتجمع في صدرها ومثل الأطفال اللي يلاقون صعوبة في النوم ليلة العيد، عاشت ليلى ليلة طويلة من الانتظار وهي تتريا اللحظة اللي بتمسك فيها زمام الأمور وبتكون في موقع قيادي، ولو ليوم واحد بس في حياتها..


اطالعت ليلى ساعتها ونشت بسرعة من مكانها في البلكونة ومشت صوب الشبرية عشان توعي أخوها خالد.. ويوم يأست من انه ينش شلته وهو راقد وودته الحمام وغسلت له ويهه لين بطل عيونه غصب وخلته يغسل أسنانه بروحه وطلعت له ثيابه عشان يتلبس.. وسارت توعي باجي اخوانها.. بس يوم دشت غرفة أمل وسارة ما لقتهن وفراشهن كان مرتب .. استغربت ليلى بس قبل لا تطلع من الغرفة عشان تشوفهن وين دشت سارة من الباب ووراها أمل.. ويوم جافن ليلى جدامهن نزلن عيونهن..


ليلى: " وين كنتن؟؟ "


سارة (وهي تطالع أمل): " هني.."


ليلى: "وين هني ؟ منو رتب لكن فراشكن..؟"


أمل: " محد رتبه .. نحن ما رقدنا هني.."


اطالعتها سارة بنظرة حادة وارتبكت أمل وردت تنزل عيونها..


ليلى: "ماشالله!!!.. ووين رقدتن؟"


سارة: " هني.. "


ليلى: "هني وين؟"


تنفست سارة بعمق وقالت وهي تدري انه اختها بتعصب: " في غرفة ماماه.. كنا نسولف هناك ورقدنا.."


بس ليلى ما عصبت وقالت وهي اطلع لهن ثيابهن من الكبت: " أهاا .. أوكى.. ياللا تلبسن بسرعة الساعة سبع.."


طلعت ليلى من غرفة خواتها وهي تحاول ما تفكر بالموضوع ومشت بسرعة لغرفة مايد وتمت ادق الباب بقوة لين ما سمعت صوت مايد وهو يقول: "خلاص قمنا!!! كسرتي الباب..!"


ليلى (وهي تبتسم): " ياللا بسرعة وايد تأخرت.."


مايد (وهو يفر اللحاف تحت): " الله ياخذ المدرسة وايامها"

مزنة يوم طلعت من غرفة الناظرة كانت تمشي بسرعة وسارة تمشي وراها وتصيح.. وقبل لا يوصلن غرفة الاخصائية التفتت مزنة لسارة وسألتها: "وانتي ليش تصيحين؟"


سارة( وهي تمسح دموعها): " بيخبرون ليلى وليلى بتحرج عليه.."


مزنة: "ومنوه قال لج انا بنتصل بليلى؟؟"


سارة: " ترى هي ولية أمري.."


مزنة: "لا يا حبيبتي.. نحن بنتصل بال king .."


سارة: "منو؟"


مزنة: " يدوه صالحة فديتها ومنو غيرها؟ .. بعطي الاخصائية رقمها وبقول لها انها ولية أمرنا.. محد غيرها بيعرف يتعامل ويا هالاشكال.."


ابتسمت لها سارة بأمل ودخلن اثنيناتهن عند الاخصائية عشان يتصلن بصالحة



صالحة في هالوقت كانت يالسة هي ويارتها أم حميد في الاستراحة اللي برى قسم العناية المركزة.. وأم أحمد كانت يالسة وياهن ، ترمسهن بأدب وكل شوي تتنهد وهي تتريا اللحظة اللي بيشبعن فيها من الرمسة وبيروحن عشان ترد هي تجابل ولدها في غرفته.. بس كل ما تسكت صالحة كانت ام حميد تبدا في سالفة يديدة وأم أحمد وحليلها مضطرة تجاملهن وتيلس وياهن.. وهني رن موبايل صالحة ويوم ردت عليه سمعت صوت مزنة وهي تصيح..
صالحة: " منو؟؟ مزنووه؟؟ شو فيج تصيحين؟؟"
مزنة: "يدووووه تعالي المدرسة الحين!!.. أبلة الرياضة ضربتني انا وساروه..!!"
صالحة (بصوت عالي ): " يعل ايدها القص الجلبة!!.. ليش ظربتكن؟"
مرت جدامهم نيرس في هاللحظة واطالعت صالحة بنظرة تهديد بس صالحة ما اهتمت لها..
مزنة (وهي تصيح ): " بس عشان نسينا لبس الرياضة.. وقالت عنا مب مربايات.. والحين يبونا نروّح البيت!"
صالحة: " تخسي الا هي تردكن البيت.. أنا الحين ياية المدرسة.. !! "
مزنة: "تعالي يدووه بسرعة.."
صالحة: " الحين يايتنكن .."
بندت صالحة الموبايل ووقفت ووقفت وياها ام احمد وام حميد وهن مستغربات..
أم أحمد: " خير يا ام فهد؟ شو مستوي؟"
صالحة: " هاي الجلبة ابلة الرياضة ضاربة مزنوه وساروه بنت اختي.. وشاتمتنهن والحين تبا تردهن البيت"
أم أحمد ( بصدمة): " جى شو مسويات ثرهن؟"
صالحة: " ما سون شي الا هي الحمارة تبا اطلع حرتها فيهن.. بس انا بأدبها.. ياللا ام حميد بردج البيت وبسير لهن.."
أم حميد:" ياللا سرنا.."
أم أحمد: " عندج اياها صالحة.."
صالحة (وهي تمشي بسرعة): " لا توصين .."
تنهدت أم أحمد براحة وردت تمشي بخطواتها الثجيلة لآخر غرفة في الممر.. ما كانت تحاتي سارونا تعرف انه صالحة بتاخذ لها حقها وزيادة .. أفكارها وخوفها واهتمامها كله هاليومين كان منصب على شخص واحد.. وهو عبدالله.. دشت الغرفة ويلست حذاله ع الكرسي وهي تتأمله.. كانت تتمنى لو انها تعرف تقرا قرآن جان قرت له ليل نهار.. بس للأسف ما تعرف وما بإيدها شي تسويه غير انها تدعي له في كل وقت انه الله يشفيه ويقوم بالسلامة.. وعبدالله كان مثل ما هو، غايب في دوامة من اللاوعي والأطباء يحاولون بكل الطرق انهم يردونه لوعيه..
.
.
بعدت الجريدة عنها وتنفست بعمق عشان تهدي أعصابها وقامت عن المكتب ووقفت تطالع الشارع اللي تطل عليه دريشة المكتب العودة.. بس للأسف وهي تطالع الشارع شافت مبارك طالع من البناية وساير صوب موتره الستيشن.. وردت تغلي في داخلها مرة ثانية.. وابتعدت عن الدريشة في نفس اللحظة اللي دشت فيها روان وهي تبتسم لليلى ابتسامة خبيثة..
ليلى: " روان ليش تأخرتي هالكثر؟؟"
روان: " الشركة كبيرة وحضرتك طلبتي مني ألف ع المكاتب كلها.. ليه..؟ في حاجة؟"
ليلى (بعد تفكير): " لا .. ولا شي.."

روان: "ولا يهمك يا ستي.. مش حسيبك هنا لوحدك تاني.. وإزا كان ده بيريحك هجيب أوراقي واشتغل عندك هنا في المكتب"
اطالعتها ليلى باستغراب وقالت: " لا لا ماله داعي.."
روان (وهي تيلس و تتذكر رمسة مبارك): " لا بس شكلك متلخبطة خالص.. "
ليلى: " لا متلخبطة ولا شي.. بس احاتي الشغل.. ها ؟ خبرتي المحاسبة اني ابا اجوفها؟"
روان: "آه حتيجي بعد شوي.. وآدي لستة فيها اسماء كل الموظفين اللي ما داوموش النهاردة.."
ليلى: " عطيني اشوف.. هممم.. خلاص.. اكتبي لي أمر بخصم 100 درهم من معاشاتهم وعطيني اياه عشان اوقع عليه.. "
روان: "حاضر.."
ليلى: " خبرتي باجي الموظفين بالقرار؟"
روان: "أيوه.."
ليلى: "شطورة.. ياللا حبيبتي سيري اطبعي لي ورقة الخصم وييبي لي اياها.."
قامت روان تنفذ اللي طلبته منها ليلى .. وفي هاللحظة رن موبايل ليلى ويوم شافت الرقم رفعت حاجبها اليمين وحاولت اطنشه .. بس ما رامت.. صح انه محمد بند التيلفون في ويهها قبل شوي بس بعد يتم اخوها وبرى البلاد وبعدين اكيد متصل يعتذر لها.. عشان جي ردت على التيلفون وهي زعلانة..
ليلى (بدون نفس): "ألو.."
محمد:" مرحبا.."
ليلى: "هلا.."
محمد: "انتي وين؟"
ليلى: "يعني ما تعرف؟"
محمد: "في البيت؟"
بطلت ليلى عيونها بقهر وقالت له: "طبعا لاء.. أنا في الشركة..!"
رد محمد يزاعج مرة ثانية: " للحين في الشركة؟؟ انا ما قلت لج ردي البيت؟؟"
ليلى: "اعتقد انك ترمس اختك العودة استاذ محمد.. لا تنسى هالشي.."
محمد: "اختي العودة احسن لها ترد البيت الحين!!"
ليلى (وهي خلاص صدق معصبة): " مب رادة البيت !!.. أوكى؟؟ راوني شو بتسوي!"
محمد: " ليلوه ليش تعاندين ؟ والله عيب اللي تسوينه "
ليلى: " لا مب عيب.. انا اجابل حلال عمي عبدالله.. وهذا اقل شي ممكن اسويه عشان ارد له الجميل.."
محمد: "بس عمي لو درى انج سرتي الشركة بيعصب.."
ليلى: "عمي عقله متفتح ويعرف انه اللي انا اسويه مب غلط.. "
محمد: "انزين وشمسة؟"
ليلى: " عندها موزة.."
محمد: "وموزة دوم بتفضى لها؟"
ليلى: " طبعا لاء.. بس انا مب دوم باي الشركة.. ييت اليوم بس لأنه عمي سهيل مشغول.."
محمد: "عطيني رقم سهيل.."
ليلى: "شو تبا فيه؟"
محمد:" انتي عطيني اياه..!"
ليلى: " أول قول لي شو تباه؟"
محمد: " بقول له يدور له حد غيرج عشان يدير الشركة!"
ليلى: " لا والله؟ ما بعطيك رقمه!"
محمد:" يا ربييييييييه!!.."
ليلى (وهي تبتسم ):" حمادة زعلان مني؟"
محمد: "حمادة في عينج..!"
ليلى: " صدق صدق زعلان؟"
تنهد محمد: " أكيد زعلان.. ليلى مابا شي يضرج ولا ابا حد يشوفج ويرمس عنج.. وعمي شركته شركة مقاولات يعني الزباين كلهم رياييل.. شو تتوقعين ردة فعلي تكون غير اني احرج وازعل؟"
ليلى: "انته لو عطيتني فرصة اتكلم من البداية كنت بقول لك اني اليوم ييت الشركة عشان اعاقب الموظفين اللي من يوم دش عمي المستشفى وهم ما يداومون.. ومن باجر بيرد عمي سهيل يدير الشركة وانا بساعده بالحسابات من البيت.. محمد انا كنت متصلة فيك مساعة عشان اطلب منك ترد البلاد.. بس يوم خبرتني عن مريم استحيت اطلب هالشي.. "
سكتت ليلى شوي وقالت بهمس: " أنا وايد محتاجتنك محمد.. حاسة اني بروحي.. ومب عارفة اتصرف.."
محمد: " ليلى.. حبيبتي انتي اقوى من جي.. خليني بس اتأكد اذا ممكن نأجل علاج مريم شوي ولا لاء وبرد عليج خبر باجر ان شالله.. صدقيني بحاول قد ما اقدر اني ارد بسرعة.. بس انتي لا تزيدين همي.. وردي البيت.."
ليلى: " ان شاء الله.. خلني بس اجتمع ويا المحاسبة وعقبها برد البيت.."
ابتسم محمد براحة: "زين.. ممكن تعطيني رقم سهيل؟"
ليلى:" هيه.. هذا رقمه.. *******"
سجله محمد في موبايله وقال لها: "أوكى .. ياللا تحملي على عمرج.. بتصل بج عقب.."
ليلى: "ان شالله.. فمان الله.."
محمد: "مع السلامة.."
بندت ليلى عن محمد وهي تبتسم هالمرة.. وعقب ثواني وصلت المحاسبة رشا ويلست ليلى وياها ساعتين وهي تحاول تفهم نظام الفواتير والدفع والحسابات المتعلقة بشركة عمها عبدالله..
.

.


الساعة عشر كان مايد يسوق نيسان مروان الجديم والشلة كلها مرتبشة وأول ما بركنوا عند العين مول لاحظ مايد باص المدرسة اللي بركن حذالهم وضحك بخبث وهو يبند الموتر وينزل من السيارة.. ويوم نزلت الشلة كلها ولاحظوا انه الباص باص بنات الثانوية ارتبشوا.. اللي يتفدى واللي يعق نغزات والبنات وحليلهن زايغات انه الأبلة تغير رايها وتردهن المدرسة.. بس يوم نزلت الأبلة من الباص وطالعتهم بنظرات تهديد صخوا كلهم ودشوا المول وهم يضحكون على خبالهم وعبطهم..


تنهدت لطيفة براحة يوم شافتهم ابتعدوا وقالت لربيعتها حنان: " انا ما صدقت الأبلة طلعتنا رحلة.. صدق هالشباب سخيفين.. كل شي يبون يخربونه!"


حنان: "لطوف جفتي اللي كان واقف ع اليمين؟"


لطيفة: " لا ما جفته.. ليش تعرفينه؟"


حنان: " لاااااااا.. بس حلو.."


ضحكت لطيفة وهي تتحجب زين عشان تنزل من الباص وقالت لربيعتها: " انتي عمرج جفتي واحد وقلتي عنه خسف؟"


حنان: " هاي هي الحقيقة.. الشباب كلهم حلوين، حتى الخسف من يلبس الغترة والعقال على طول ينجلب غزال.. مب شراتناا نحن البنات.. مع انه المفروض يكون العكس.. "


لطيفة: "والله عاد هذا رايج انتي.. أنا اجوف البنات احلى بوايد.. وما أتمنى ابد اني اكون ريال.. تتخيليني بلحية؟"


اطالعتها حنان وهي تمشي وياها عشان يلحقون بباجي البنات: " اممممم.. وعععع.. لا ما تنفعين.. تمي بنية احسن لج"


لطيفة: " مالت.."


هني وقفت أبلتهم وقالت: " لفن في المول على راحتكن بس عن الحركات .. أنا وأبلة منيرة بنسير نتشرى.. واباكن تتيمعن هني عقب ساعة.. واللي بتتأخر ببلغ عليها الإدارة.. مفهوم؟"


البنات بصوت واحد: "مفهوم.."


سارت عنهن الأبلة وانتشرن البنات في أرجاء المول.. ولطيفة استغلت هالفرصة عشان تسير تتشرى البيجامات اللي كان خاطرها فيهن وأبوها ما يطيع ياخذ لها اياهن.. وحنان بعد كانت تبا تسير تاخذ لها مكياج.. في الوقت اللي كان مايد وربعه سايرين ياخذون لهم تذاكر للفلم اللي بيعرضونه الساعة 11


مروان: " ميود شو هالفلم اللي اخترته؟ ما نباه!!"


مايد: " Taking lives عجيب شو تقول انته؟"


سالم: "نحن متفقين ندش Torque"


مايد: "والله عاد ما كنت اعرف انهم يعرضون هالفلم اليوم.."


مروان: " بس Torque احلى.. ريس ودراجات .. رقييص من الخاطر.."


مايد: " وهالفلم فيه انجلينا جولي..!"


مروان: "أم براطم؟"


مايد: " هيييييه.."


سالم: "هلا والله!!.. خلاص عيل Torque بنشوفه عقب.."


مايد: "صدقوني ما بتندمون.. هالفلم فن"


ميد اللي كان يالس في الكوفي شوب ياهم وهو يمشي بسرعة وقال: " ياللا بسرعة خذوا التذاكر وتعالوا.. البنات كلهن يالسات هناك في الكوفي شوب."


مايد: "خلهن يلتعنن.. شو نبا فيهن.."


مروان: " خلنا ندور رزقنا بلاك انته؟"


مايد: " أي رزق هذا انته من يومين مخبرني انك تحب.."


مروان: " عندي وحدة احبها.. ووحدة صديقة.. ووحدة اعاملها مثل اختي.. "


مايد: "و عندك مكان لهالبنات بعد؟"


مروان: "أكييييد.."


سالم: "حشا مب قلب.. فندق!"


مروان: " خمس نجوم طال عمرك.."


مايد: " بنسير الكوفي شوب بس لا تسوون لهن سالفة صدقوني البنات سخيفات.. يوم تركض وراهن يتكبرن عليك.. بس تعال عاد وطنشهن.. والله هن اللي بيتحرقصن عشان تعطيهن نظرة بس.."


سالم: " هههههههههه ما شالله خبرة.."


اطالعه مايد بنظرة وساروا كلهم صوب الكوفي شوب، ورغم نصايح مايد لهم بس ربعه من شافوا البنات نسوا كل شي وطاحوا فيهن طيحة.. ومايد اللي تظايج في البداية من دفاشة ربعه ، عيبته السالفة عقب ويلس يطالع هبلهم ويضحك عليهم .. بس وهو يهمس بشي في إذن ربيعه سالم يت عينه على ثنتين كانن مارات حذال الكوفي شوب ، وحدة فيهن كانت متغشية والثانية متحجبة بس ويوم يت عينه في عين البنية المتحجبة نزل عيونه على طول وهي بعد.. كانت نظرة خاطفة استمرت ثواني بس.. ورغم هذا حس مايد بإحساس غريب جدا كأنه انفصل عن اللي حواليه كلهم وانتقل لعالم ثاني ما يشوف فيه الا صاحبة العيون الناعسة اللي اخترقت نظرتها أعماق روحه..




في الطرف الثاني ، كانت لطيفة تحاول انها تتوازن وترد طبيعية عشان ما تلاحظ حنان اللي استوى لها.. حنان يوم ابتعدوا عن الكوفي شوب عقت الغشوة عن ويهها وقالت: "شفتيه؟؟ الحلو اللي قلت لج عنه كان يطالعنا!"
لطيفة: "ها؟؟ هييه.. أعرفه.. هذا مايد اخو ربيعة اختي.."
حنان: " الله اسمه حلو!!.. تعرفينه؟ ووين شفتيه انتي؟"
لطيفة: "كنت في بيتهم مرة وشفته نازل من فوق.. بس تراه يحب بنت خالوته.."
حنان (بإحباط): "أفاااا.. "
لطيفة (وهي تبتسم ابتسامة باهتة): " هيه.. اسمها عليا.. اثنيناتهم يحبون بعض.. ياللا!.. الله يهنيهم ان شاء الله.."
حنان: " ويوفقنا انا وياج ويرزقنا بعيال الحلال.."
لطيفة: "هههههههه وايد مستعيلة حظرتج.. أنا بعدني صغيرة ع العرس.. "
ضحكت حنان ويلست تهذرب على لطوف اللي كانت تبتسم لها من دون ما تسمع ولا كلمة من اللي كانت تقوله.. لطيفة نست البيجامات اللي كانت تبا تشتريهن.. ونست الهدية اللي كانت تبا تاخذها لموزة اختها.. في هاللحظة نست كل شي الا الاحساس العميق بالألم اللي كان في داخلها.. امس فليل كانت رادة على قصة في المنتدى اللي تكتب فيه.. القصة كانت عن وحدة حبت من أول نظرة.. ولطيفة كتبت رايها وقالت انه هالشي سخيف ومستحيل يستوي.. واليوم.. وهي تتذكر ابتسامة مايد ونظرته العابثة .. ردت تسأل نفسها مرة ثانية إذا فعلا كان هالشي مستحيل؟
.
.


.
.
في شقتهم بنيويورك ، محمد كان متصل بدكتور مريم ويسأله إذا كان يقدر يأجل العلاج كم شهر.
محمد: We have an emergency in the country and we need to go back immediately, so I was wondering if we could postpone the treatment
( ممكن نأجل العلاج شوي لأنه عندنا ظرف طارئ في البلاد ولازم نسافر حالا)
الدكتور: You don't need to do that Mr. Mohammed. I told you from the beginning that no surgery is needed. Your wife will be treated by a new nutrition system and all I need to give you at the moment is the diet that she should stick to to get better
(مب لازم نأجل العلاج ، انا خبرتك من البداية انه ما في داعي للعملية . مرتك بنعالجها عن طريق نظام تغذية يديد وكل اللي بعطيك اياه حاليا هو جدول غذائي لازم تلتزم به مريم عشان تتحسن حالتها)
محمد:you mean we can go home right away without worrying?
(يعني نروم نرد البلاد على طول وبدون أي خوف؟)
الدكتور: No need to worry at all. I went through all the results and believe me, after a year of treatment, your wife is going to be just fine. The only danger on her life is connected with pregnancy because her heart is very weak.
(ما في داعي للخوف أبدا، أنا راجعت نتايج الفحوصات وصدقني ، عقب سنة من العلاج زوجتك بتكون بخير، الخطر الوحيد على حياتها مرتبط بالحمل لأنه قلبها وايد ضعيف)
محمد: yes, am aware of that doctor. We have discussed it
(هيه اعرف، وتناقشنا في هالموضوع من قبل)
الدكتور: ok then, please come to meet me tomorrow with your wife and I'll give you the diet she should stick to and after that you have to see me every 3 months.
(أوكى عيل باجر مر عليه في العيادة انته ومرتك وبعطيك الجدول الغذائي اللي المفروض تلتزم به مرتك، بس لازم تراجعوني كل 3 اشهر عشان اغيره)
محمد:Sure. Thank you doctor
(أكيد، مشكور دكتور)
الدكتور: Good Bye Mr. Mohammed
محمد: Goodbye
بند محمد التيلفون وهو يبتسم براحة ، وسار الغرفة عشان يشوف مريم اللي كانت بعدها راقدة. كان خاطره يوعيها ويخبرها انهم بيردون البلاد من كثر ما كان مستانس بس غير رايه وسار يطلع بيجامته من الكبت عشان يسبح ويرقد.. بس قبل لا يرقد كان مقرر يتصل بسهيل ..





سهيل كان توه واصل راس الخيمة الساعة 11 ونص يوم اتصل به مبارك، سهيل كان متوقع انه مبارك يتصل به لأنهم امس يلسوا يسولفون عقب ما روحوا عن عبدالله وسهيل شرح له وضعه في الشركة وانه مب عارف كيف يتصرف وكان باين انه مبارك يبا يساعده بس ماله ويه يرمس لأنه هو اللي طلب يفض الشراكة اللي بينهم.. والحين يوم رد سهيل على التيلفون كان متأكد انه مبارك بيعرض عليه مساعدته ..


مبارك: "السلام عليكم"


سهيل: "وعليكم السلام والرحمة .. يا هلا والله"


مبارك: " هلا فيك.. اشحالك؟"


سهيل: "الحمدلله يسرك الحال.. انته شحالك؟"


مبارك: " بخير ربي يعافيك.. "


سكت مبارك شوي.. كان متردد يخبر سهيل انه سار الشركة ولا لاء.. بس عقب قرر ما يخبره وقال له: " سهيل امس يوم كنت تسولف لي عن الشركة حسيت انك متوهق شوي.. "


ابتسم سهيل.. توقعه كان صح: " اكيد متوهق.. أنا محامي شلي بالتجارة.."


مبارك: " انزين.. انته تعرف اللي ابا اقوله.."


سهيل: " ما ادري بك والله.. شو في خاطرك؟"


مبارك: " سهيل اذا تباني اساعدك في الشغل لين ما يقوم عبدالله بالسلامة انا ما عندي مانع.."


سهيل: " ما تقصر يا مبارك.. وهذا العشم فيك."


مبارك: " بس ما اعرف اذا هالشي بيظايج عبدالله.. "


سهيل: "انته تعرف عبدالله زين.. عبدالله مب ريال حقود وينسى بسرعة.. وبيشوفها كبيرة منك انك ودرت شغلك وساعدته.."


مبارك: " أنا ما بودر شغلي.. بس بما انه شركتي الحين عندها مشروع واحد بس .. المدير اللي عندي يروم يتابعه .. وانا متى ما احس عمري فاضي بمر شركة عبدالله وبتابع الشغل.. وانته أي شي تباه لا تتردد واتصل بي على طول.."


سهيل: "ما تقصر .. ما تقصر يا مبارك.."


مبارك (بخبث): " انته وين الحين؟ في المكتب؟ بمر عليك.."


سهيل: "لا أنا توني واصل راس الخيمة .. العمال هني مشاكلهم ما تخلص.. "


مبارك (يبتسم):" انزين تباني امر المكتب واراجع الملفات؟"


سهيل: "لا لا لا.. ما يحتاي.. أنا يوم برد العين بعطيك الملفات كلها.."


مبارك: " خلاص عيل نتلاقى اليوم ان شاء الله.."


سهيل: " على خير ان شالله.."


بند سهيل التيلفون وفي نفس اللحظة رد يرن مرة ثانية.. واستغرب سهيل لأنه الرقم كان طويل.. ويوم رد وسمع صوت محمد فرح من خاطره..و عقب ما سلم عليه وسأل عنه وعن أخباره .. دش محمد في الموضوع.


محمد: " ليلى خبرتني انها سارت الشركة اليوم.. عمي كيف خليتها تسير هناك؟ انته تعرف انه البناية متروسة رياييل.."


سهيل: " انزين وشو فيها؟ ليلى بنية حشيم وماشالله عليها عاقل وتعرف تتصرف.."


محمد:" ادري بس بعد ما يستوي اتم هناك بروحها.."


سهيل: "عندها روان ومحد يروم يدش عليها قبل لا يستأذن.. واليوم ماشي اجتماعات ولا مواعيد ويا الزباين يعني لا تحاتي من هالناحية.. هي طلبت مني تمر الشركة اليوم بس وانا من باجر برد اشوف الشغل بنفسي"


محمد: " الله يعطيك العافية عمي.. ما تقصر.. وانا بحاول ان شالله ارد بأقرب فرصة البلاد.."


سهيل: " لا تستعيل وتودر اشغالك وترد البلاد.. أنا عندي مبارك بن فاهم هني بيساعدني في الشغل.."


محمد: " مبارك؟ مب هو اللي كان بيرفع قضية على عمي هذاك اليوم؟"


سهيل: " السالفة مب جي.. اثنيناتهم كانوا فاهمين الموضوع غلط وكل واحد فيهم غلط على الثاني.. بس الحمدلله ما وصلت السالفة للمحاكم.."


محمد:" وانته تروم توثق فيه؟"


سهيل: "أكثر حتى عن عمري.. مبارك شاطر و بيعرف يمسك الشغل زين.."


محمد: " خلاص عمي اللي تشوفه.. وعمي عبدالله شو صحته الحين؟؟"


اختفت الابتسامة عن ويه سهيل وقال:" الله يشفيه ويقومه بالسلامة ويرد لنا مثل اول واحسن.."


محمد: " ان شالله.. عمي اول ما ارد البلاد ابا ايلس وياك.. واباك تخبرني بسالفة مرت عمي .. ليلى خبرتني انك كنت وياه هذاك اليوم.."


سهيل: "هيه ان شاء الله من ترد البلاد بخبرك بكل شي.. انته لا تحاتي واطمن من ناحية اهلك تراهم في عيوني.."


محمد: " تسلم يا عمي دومك ما تقصر.. ياللا عيل الحين ما بطول عليك.. تامرني بشي ؟"


سهيل: " سلامتك .. تحمل على عمرك .."


محمد: " ان شالله .. فمان الله.."


سهيل: "مع السلامة.."


.

.


في مدرسة البنات الابتدائية كانت عاصفة من الغضب داشة غرفة المديرة .. وهالعاصفة أكيد صالحة، اللي أول ما دشت غرفة المديرة شافت سارة ومزنة يالسات على القنفة اللي صوب الباب والتفتت للمديرة اللي أول ما شافتها وقفت وهي تبتسم وتمد ايدها لصالحة..


سارت لها صالحة وسلمت عليها وهي تطالعها باحتقار..


صالحة: " شو مسويات البنيات؟ ووينها الابلة اللي ظربتهن؟"


الناظرة: " أبلة هناء الحين بتي عقب شوي.. تفضلي الوالدة .. انتي ام مزنة؟"


صالحة: " أنا يدوتهن.. و مب يالسة انا مب يايه هني ايلس.. ييبي لي هالابلة بتفاهم وياها.."


الناظرة: " هدي اعصابج الوالدة وتفضلي يلسي.. ترا ابلة هناء ما غلطت عليهن.. هن اللي طولن لسانهن .."


هني دشت أبلة هناء ويوم شافت صالحة واقفة ابتسمت لها بس صالحة ما عطتها مجال انها تسلم وسألتها: " إنتي اللي ظاربتنهن؟"


اطالعتها ابلة هناء بخوف والتفتت على مزنة وسارة وقالت: " ما ضربتش حد.. أنا بس .."


مزنة: " ظربتينا.. ويريتي اذني.. وخليتينا نركض في هالحر 12 مرة..!"


أبلة هناء (وهي تطالع صالحة): " شوفي يا ستي البنتين دول مش متربيات.. "


قبل لا تكمل رمستها هجمت عليها صالحة وهي تزعاج: "مب مربايات.. أنا براويج التربية يالهرمة.. شو تتحريني ما عرفت اربي بناتي؟.. "


أبلة هناء كانت تحاول تتفادى الظربات اللي تيها من نعال صالحة والمديرة ركضت برى عشان تشرد وفي نفس الوقت تييب الوكيلة والاخصائية يساعدونها تهدى الموقف .. ومزنة وسارة واقفات بعيد ويضحكن..


أبلة هناء: " ما تضربيش!!.. انا حشتكي عليكي وحتشوفي.."


صالحة: " انا اللي بشتكي عليج وعلى المدرسة كلها بعد.. عيل يالجلبة تظربين هاليهال وتخلينهن يركضن في هالحر وانتي ميلسة في الظلة؟؟ "


يوا الوكيلة والاخصائية وحاولوا يسحبون ابلة هناء عن صالحة بصعوبة ويوم قدروا عليها طلعت ابلة هناء من غرفة الناظرة وهي تتوعد وتهدد.. وصالحة اجتمعن عليها الابلات وهن يحاولن يهدنها من دون فايدة..


الناظرة: " الوالدة هدي اعصابج.. واحنا اسفين وابلة هناء بنرمسها بس انتي هدي اعصابج.."


صالحة: " شسمج انتي؟؟"


الناظرة: "نايلة.."


صالحة: "شوفي يا نايلة.. هالبنتين مابا حد يتقرب منهن ولا يأذيهن بكلمة.. والا والله العظيم اسير بروحي الوزارة واشتكي عليج انتي.. انا مطرشة بناتي المدرسة يتعلمن الشي اللي بيفديهن.. مب عشان ينظربن ويراكضن في الشمس.. تفهمين؟؟"


الناظرة: " ان شالله.. ان شالله.. الوالدة تحت امرج.. وابلة هناء طيبة ومب قصدها يمكن هي عصبت عليهن اليوم بس صدقيني مب دوم جي.."


صالحة: " طيبة عندج انتي وجدامج بس.. ولا من تطلع عنج وتجابل البنيات ما تعرفينها شو تسوي بهن.. أنا هالمرة ما بشتكي عليها .. لكن المرة الياية بس خليها تغلط عليهن بجلمة وبتشوف.. (والتفتت على مزنة وسارة) سيرن ييبن شنطكن بردكن البيت.."


مزنة وسارة اطالعن المديرة اللي هزت راسها لهن وركضن برى الغرفة بفرح وهن متجهات لغرفة الصف.. وأول ما دشت مزنة الصف كل البنات كانن يطالعنها وهي نافخة صدرها بغرور واستأذنت من أبلة الانجليزي وشلت شنطتها هي وسارة وروحن البيت ويا صالحة اللي فهمت الادارة بأسلوبها الخاص انه تعاملهم ويا الطالبات غلط في غلط وأحسن لهم يعدلونه




.


الساعة 12 ردت ليلى البيت وفي ايدها ثلاث ملفات وعلى ويهها ابتسامة رضا.. وأول ما دشت الصالة شافت موزة يالسة ع القنفة تطالع التلفزيون وشمسة راقدة في حظنها.. وسارت لها ويلست حذالها..


موزة (وهي تبتسم وتبند التلفزيون): " هلا والله!!.. ها؟ طمنيني؟ شو سويتي؟ شو كانت الشركة؟"


(وهي تعق شيلتها وعباتها): " روووووووعة.. رووعة موزووه.. والله اتمنى كل يوم اسير.. "


موزة: "عاد مب على كيفج.. مب كل يوم عيد.."


اقتربت ليلى من شمسة وباستها على خدها وقالت: "شو أخبار الأمورة شموس؟ ما ادلعت عليج؟"


موزة: "لا فديتها من الصبح وهي ساكتة.. وتوها رقدت.."


ليلى: " حبيبتي والله يا موزة.. تعبتج ويايه.."


موزة: " جب جب.. ودري عنج هالرمسة الماصخة وخبريني شو سويتي في الشركة.."


ليلى ابتسمت بخبث وقالت : " منو تتوقعين شرفنا اليوم بزيارة في الشركة؟"


موزة: " منو؟"


ليلى: " حزري فزري.."


موزة: " بتذليني عاد؟ خبريني منو.."


ليلى: " مبارك!!"


شهقت موزة وبطلت عيونها وهي تسأل ليلى: " احلفي؟؟ صدق ليلوه؟"


ليلى:" هيييييييه.. انا بروحي انصدمت يوم شفته..!!"


موزة: " خبريني.. خبريني بكل شي.. شو كان لابس.. وشو قال.. وشو استوى.. كل شي ليلوه والله ما تنسين ولا شي.."


ليلى: "هههههههه.. انزين انزين بخبرج.."


ابتسمت موزة بحماس ويلست تسمع التفاصيل اللي كانت ليلى تحكيها لها .. وأول ما خلصت ليلى وصل خالد من المدرسة وعقبه وصلت صالحة ووياها مزنة وسارة وانشغلت ليلى وياهم وما حست بالتغير اللي طرى على ربيعتها اللي سارت وتلبست عشان تروح بيتهم وانصدمت يوم شافتها نازلة من فوق وهي لابسة عباتها ونقابها.. وسألتها: " موزوه .. وين سايرة ما بتتغدين ويايه؟"


موزة: " لا حبيبتي حاسة بتعب وبرد البيت.. ان شالله بدق لج العصر.."


ليلى: " كله مني انا.. تعبتج ويايه وايد.."


موزة: " عن السخافة ليلوه .. انا ما سويت شي .. "


مشت ليلى وياها للباب .. واطالعتها وهي تركب الموتر وتروح بيتهم.. وردت عند خالوتها صالحة عشان تشوف شو سالفة مزنة وساروه.. وما حطت في بالها ابد انه موزة روحت من عندها وهي متظايجة




.


في الكويت، فاطمة كانت غارقة في كآبتها رغم انها عاهدت نفسها ما تفكر بعبدالله عقب اليوم بس غصبن عنها كانت ترد وتفكر فيه.. ولميا اللي كانت يالسة وياها هالاسبوع كانت ملاحظة التغير السلبي اللي تمر به ربيعتها وكانت وايد مقهورة من هالشي.. عشان جي سارت واستأجرت لهم كمن فلم اكشن عشان تعدل مزاجها وكانت واقفة في المطبخ تسوي لهم بوب كورن.. وفاطمة يالسة في الصالة بالبيجامة ورافعة شعرها بمشبك ولابسة نظارتها وويهها شاحب من الهم.. بعكس لميا اللي كل ما تمر عليها سنة تحس انها تصغر في العمر اكثر وخصوصا اليوم كانت مغيرة قصة شعرها وطالعة قمر.. ابتسمت لها فاطمة يوم شافتها ياية من المطبخ والبوب كورن في ايدها..


فاطمة: "مب مصدقة انه لميا دشت المطبخ .."


لميا (وهي تيلس حذال ربيعتها وتشغل الفيديو بالريموت كونترول): " شفتي عاد؟ تخليت عن برستيجي ودشيت المطبخ عشانج.. انتي عاد تخلي شوي عن مزاجج الأسود واضحكي عشاني.."


فاطمة (بدون نفس): "هاهاهاهاهاها.. "


لميا: " أطر منج الضحكة انا؟؟ اضحكي عدل ويا ويهج.."


فاطمة: "ههههههههه.. فديتج يا لموي والله مسوية لي جو هني.."


لميا: " ملزومة فيج شو اسوي..؟ اممم.. صدقيني الحزن والتفكير ما راح ينفعج.. انتي مب صغيرة.. وتقدرين تتحكمين بمشاعرج.. هالريال ما بينج وبينه أي شي غير رقم تيلفون وانمسح من موبايلج.. "


فاطمة: "يا ربي على التناقَض.. مب جنه انتي نفس الانسانة اللي نصحتني قبل شهر اني اتصل به واجدد علاقتي وياه.."


لميا (بنظرة بريئة): " أنا؟ متى كان هالحجي؟ "


فاطمة: " ما ادري بج.. اسألي روحج.."


لميا: " اممم ما اذكر.. اللي أذكره اني كنت دوم اعارض هالعلاقة.."


فاطمة: " ههههههه حتى ذاكرتج تشتغل بمزاجج يا لموي؟"


لميا: " هههههههه إي.. امم.. صدق فطوم ليش مسحتي رقمه؟"


فاطمة: "هو قرر انه ما يحتفظ بي في حياته.. فليش انا احتفظ بشي تافه مثل رقم تيلفونه؟"


ابتسمت لميا: " فطوم؟؟"


فاطمة: "عيونها.."


لميا: " عقب هالعمر كله.. وهالتجارب كلها .. بعدني للحين اسأل عمري.. هل في شخص في هالدنيا يستاهل انه نعطيه قلوبنا، ونكتب له كل اشعارنا، ونحلم به ليل نهار؟ هل في شخص يستاهل إنا نحفر اسمه في شرايينا ونوهبه كل المشاعر اللي في داخلنا؟"


فاطمة: " لو سألتيني هالسؤال قبل اسبوع كنت بقول لج اكيد في.. بس اليوم مب متأكدة اذا كان في شخص في الدنيا يستاهل اني حتى اعفس مزاجي عشانه.."


لميا: " بخبرج بشي.. محد ابد يعرفه .. ولا حتى انتي.."


اطالعتها فاطمة باهتمام.. وسألتها : "شو هالشي؟"


لميا: "تذكرين أول سنة لنا بالجامعة؟ "


فاطمة (وهي تبتسم): "أكيد.."


لميا: " تذكرين شكثر كنت دبدوبة هاذيج الايام؟"


فاطمة: "ههههههههه إي.. والله انجاز اللي سويتيه بعمرج الحين.. مستحيل اللي يشوفج الحين يقول هاي هي لميا أيام الجامعة.."


لميا: " الريجيم والرياضة ابتديت اسويهم لسبب .. هاذيج الايام كان في حياتي سر .. وكنت احرص دوم انه محد يعرف عنه شي.. "


فاطمة: "سر؟"


لميا: " إيه.. ببساطة كنت احب.. كان حبي الأول.. استمريت وياه سنتين على التيلفون.. كان يتصل ببيتنا واتم اكلمه بالساعات .. وكان قلبي المراهق متأكد من اني خلاص عشت الحب وهو كان دوم يقول لي انه يحبني وانه مستحيل أي شي في الدنيا يفرق من بيننا.."


فاطمة: "منو هذا؟؟ وليش ما خبرتيني عنه من قبل؟؟"


لميا: " بتعرفين الحين ليش ما خبرتج.. المهم مرت الايام وكان دوم يحاول انه يجوفني وانا ما ارضى.. بس في أول سنة لنا بالكلية قلت له انا موافقة انك تشوفني من بعيد.. ووصفت له شو بلبس وهو كان موجود يوم كنا طالعين من الجامعة وشافني.. "


فاطمة (باهتمام): " وبعدين؟"


لميا ( والدموع ابتدت تتجمع في عيونها): " اتصلت به أول ما وصلت البيت.. كنت مستانسة اني جفته.. غبية صح؟ .. تدرين شو قال لي؟"


فاطمة: "شو؟"


لميا: "قال لي يا ليتني جفتج قبل لا احبج.. كنت ما ضيعت سنتين من عمري عليج.. قال لي انه يفضل يحب وحدة غبية وبدون شخصية على انه يحب وحدة دبة وخسفة شراتي.."


فاطمة لوت عليها ولميا حست انه الجرح ابتدا ينفتح مرة ثانية وبقوة في داخلها.. بس عقب هالسنين كلها وعقب هالتصنع اللي كانت عايشتنه وقناع البرود اللي كانت دوم تواجه به الناس كانت محتاجة للحظة الصراحة هاذي.. عشانها وعشان فاطمة..


لميا:" ساعتها عرفت انه الحب كذبة.. مجرد مشاعر زايفة.. وقصور من وهم نرسمها في خيالنا وبس.. وعرفت انه ما في أي انسان يستاهل نتخلى عن كرامتنا عشانه.."


فاطمة: "يا حبيبتي يا لموي.. "


لميا: " مب شي يديد على الرياييل انهم يجرحونا.. ويعورون قلوبنا.. ومثل ما انجرحتي من عبدالله انا بعد انجرحت في يوم.. خلج قوية وخلي هالشي اللي استوى لج سبب عشان تكونين احسن واقوى.. if it won't kill you, it will make you stronger honey"


فاطمة: " كالعادة حبيبتي.. معاج حق.. "


ضحكت لميا وهي تمسح دموعها وسألت ربيعتها: " بتشوفين الموفي؟"


فاطمة: " إيه أكيد.. حطيه.."


قامت لميا تحط الشريط في الفيديو وابتسمت فاطمة وهي تطالعها.. دام انه ربيعتها وياها ما له داعي تخاف.. أو تحس بالتعب والحزن.. ومهما كان النسيان صعب.. بتواجهه فاطمة وبكل قوتها


.


.
.


.

.


في دولة ثانية، وبالتحديد في قطر ، كانت لميا (خطيبة أحمد) يالسة ع النت تسمع أغاني وتلعب pool ونوال اخت خطيبها يالسة ع الشبرية تقرا مجلة وتغني بصوت واطي ويا محمد عبده اللي صوته كان يوصلها من لاب توب لموي..


لميا: " نوال؟"


نوال (وعيونها ع المجلة): "همم؟؟"


لميا: " أحمد ما قال لج إذا بيمر بيتنا اليوم ولا لاء؟"


نوال: " لا ما جفته اليوم من الأساس.. طلع الصبح من وقت وراح الدوام.."


لميا: " امس كان زعلان مني ومب راضي يرد على تيلفوناتي.. تكفين نوال كلميه وخليه يتصل بي.."


نوال: " وليش حظرتج مزعلة اخوي؟"


لميا (وهي تبند الpool وتتصفح باجي المواقع): " اخوج دلوع .. قلت له بأجل العرس شهرين زيادة وزعل.."


نوال: " يحق له.. مب كافي يعني انه صبر سنة بحالها وهو يتعالج ؟ خلاص الريال ما يقدر يصبر اكثر.."


لميا: " بس انا محتاجة وقت اتجهز فيه اكثر للعرس.."


نوال: "بتتجهزين عقب ما تعرسين.. بتشترين من اوروبا سوالفهم هناك احلى من اللي عندنا هني.."


لميا: " هممم.. أصلا جي ولا جي أحمد ما بيرضى يأجل العرس.. عنيد وايد اعرفه.."


ابتسمت نوال وردت تطالع المجلة.. ولميا دشت على موقع كانوا حاطينه رقم واحد في قائمة المواقع العربية.. وكان اسمه ليلى.نت .. وتمت تطالع الصور اللي فيه وهي تبتسم.. كانت فيه مجلدات كبيرة متروسة صور .. والموقع مقسم لعدة اقسام ولميا كل شوي تبطل قسم وتطالع اللي فيه.. ويوم وصلت لقسم إيطاليا قالت لنوال: " نوولة تعالي جوفي صور إيطاليا في هالموقع.."


نوال (بدون اهتمام): " جوفيهن بروحج انا شبعت من ايطاليا "


لميا: " كيفج.."


تمت لميا تطالع الصور وحدة وحدة ومتخبلة على ايطاليا .. وحطت في بالها تخلي أحمد يوديها هناك في شهر العسل.. خصوصا انه ما كان يشوف هاذيج الايام واكيد هو بعد ما استانس بروما.. بس من بين الصور اللي شافتهن كانت في صورة خلت لميا تبطل عيونها ع الاخر.. وتطالع الشاشة بكل تركيز..


كانت صورة احمد .. وهو يالس في البيازا في روما.. وصورته كانت وايد واضحة وتعليق المصورة تحت الصورة كانت كلمة وحدة بس " A Dream"


لميا حست بغيرة فظيعة تتدافع في داخلها .. منو هال "ليلى هاذي" وليش بالذات صورت أحمد خطيبها؟ موقعها كان كله صور عن الطبيعة والمباني .. الصورة الوحيدة اللي فيها ادمي كانت صورة احمد.. وشو قصدها من الكلمة المكتوبة تحت الصورة.. ؟


ما حست لميا بعمرها الا وهي ادور ايميل ليلى في صفحة " أتصل بنا" ويوم تبطلت لها صفحة الايميل كتبت لها لميا ايميل طويل عريض طلعت فيه كل اللي في خاطرها..


.


.


ليلى





موزة يوم وصلت البيت على طول سارت فوق في غرفة اختها لطيفة.. كانت محتاجة ترمس احد وما كانت تبا تيلس ويا امها في هاللحظة.. ويوم بطلت باب غرفة اختها شافتها يالسة ع النت بثياب المدرسة وضحكت لها بتعب..


موزة: " والله انج مدمنة.."


التفتت لها لطيفة وهي تضحك وقالت: " وافتخر بهالشي.."


موزة: " قومي بدلي ثيابج مب زين جي.."


لطيفة: "عقب عقب.. ألحين بشوف منو مطرش لي رسايل.."


تنهدت موزة وهي تيلس على الشبرية ومن سمعت لطيفة صوت التنهيدة.. افترت وجابلت اختها وهي تسألها باهتمام: " موزوووه؟ شو فيج؟"


موزة: "ولا شي.."


لطيفة: "ياللا عاد قولي.. شو فيج.."


موزة: "لطوف اشياء سخيفة.. ما عليج مني ردي هذربي ويا ربعج.."


لطيفة (وهي تقوم من مكانها وتتمدد ع الشبرية حذال اختها): " مابا.. خبريني شو فيج"


قربت موزة ويهها من ويه اختها وقالت بهمس: " متظايجة.. وايد.."


لطيفة: "من شو؟"


موزة: "من ليلى.."


لطيفة: "معقولة؟ ليش شو سوت؟"


موزة: " هي ما سوت شي.. بس بعد حاسة بظيج منها.. تدرين هي اليوم سارت الشركة.."


لطيفة: " هيه خبرتيني.."


موزة: " وشافت مبارك هناك.."


لطيفة: " صدق؟"


موزة: "هيه.. ورمسها.. مدري وهي تخبرني.. حسيت بظيج.. لطوف هاي ربيعتي واحبها موت بس بعد حسيت بغيرة منها.."


لطيفة: " اعرف. طبيعي تحسين بهالشي موزوه.. بس بعد لا تخلين ريال يفرق بينج وبين ربيعتج"


موزة: "ما في أي شي ممكن يفرق بيني وبين ليلوه.. ولا حتى مبارك نفسه.. وانا ادري انه ليلى ما ادانيه..بس بعد.. ما قدرت اقاوم احساسي بالغيرة.. واني اتمنى لو كنت مكانها.. وانا اللي شفته ورمسته.."


لطيفة: " موزة.. غناتي لا تعذبين عمرج بهالافكار.. انتي اصلا ما تعرفين اذا كانت مشاعرج تجاه مبارك حب او مجرد اعجاب.."


قاطعتها موزة وهي تنش فجأة وقالت لها بغضب: " نعم؟؟ إعجاب؟؟ لطوف انا احبه وانتي اول وحدة عرفتي بهالشي.. !! كيف تقولين انه مجرد اعجاب؟؟ "


لطيفة وقفت ع الشبرية عشان تجابلها وقالت لها: " بس موزوه الحب ما ينولد من لحظة.."


موزة: "وانتي شو دراج؟ أصلا انا ليش ارمسج انتي؟ صدق ما عندي سالفة.."


نزلت موزة عن الشبرية ومشت بسرعة صوب الباب


لطيفة: "موزووه.."


بس موزة طلعت وصكت الباب وراها بقوة.. ووقفت لطيفة تطالع الباب بظيج. . موزة غبية وهي غبية اكثر عنها.. اثنيناتهم يحبون وهم.. موزة تحب مبارك اللي مستحيل في يوم يلتفت لها.. ولطيفة تحب مايد اللي عنده حبيبة ومب أي حبيبة.. وحدة احلى عن لطيفة بألف مرة..


عضت لطيفة على شفايفها بقوة عشان ما تنزل دموعها وسارت للكمبيوتر وبندته.. فجأة حست انها ما تبا ترمس حد ولا تبا تجابل الكمبيوتر. كل اللي تبا تسويه انها ترقد.. وتنسى همومها شوي


.

" غيبوبة؟؟"
ياسمين من الصدمة يلست ع الأرض لأنها حست انه ريولها مب قادرة تشلها.. أبوها توه خبرها عن عبدالله مع انه يعرف الخبر من كم يوم بس ما حب يظايج ياسمين او يحنن قلبها على ريلها.. عشان جي تريا شوي واليوم شاف انه الفرصة مناسبة عشان يخبرها..
ياسمين كانت تطالعه وويهها معتفس .. وسألته وهي حاطة ايدها على قلبها: " منو خبرك؟"
علي:" اتصلت به ع الشركة وخبرتني سكرتيرته.."
ياسمين: " شو قالت ؟ من متى وهو في غيبوبة؟؟ شو استوى له؟؟"
علي: "جلطة دماغية.. من يوم .. احم .. الجمعة.."
ياسمين: "شوو؟؟؟؟ يعني انا السبب!!! انا اللي ذبحته.. أن السبب.. "
انصدم علي من ياسمين اللي غطت ويهها بإيدها وابتدت تصيح بقوة.. ما توقع منها ردة الفعل هاذي.. هو توقع انها تظايج بس مب لدرجة انها تصيح .. ويلس حذالها ع الارض وقال لها: "وانتي ليش تصيحين الحين؟ انتي بروحج قلتي انج ما تحبينه.."
ياسمين: "أبويه ودني عنده ابا اجوفه.. الله يخليك.. ودني المستشفى.. هو في المستشفى الحين؟؟ بتوديني باباه صح؟؟"
علي: " انتي شو تقولين؟؟ نسيتي انه طلقج؟؟ تبين تفظحيني؟؟ "
ياسمين يودت ايد ابوها ورصت عليها وهي تصيح من خاطرها: " باباه الله يخليك.. الله يخليك.. ودني عند عبادي.. الله يخليك.. بس بشوفه من بعيد والله ما بدش عنده الله يخليك.."
علي ير ايده من ايدها وقال لها بنبرة حادة وهو يقوم عنها: " بس !!.. ولا كلمة.. دوم تسوين اللي في راسج ولا عمري خالفتج او رفضت لج طلب.. لكن هالمرة بتتأدبين وبتسوين اللي انا اقول لج اياه.. تفهمين..؟"
بس ياسمين تمت تزاعج بصوت عالي وتضرب الارض بريولها وهي تصيح.. " بشوفه يعني بشوفه وبسير لها باباه.. بسير العين بروحي.. مب لازم انته توديني .. بسير بروحي!!.. مب على كيفك...!!!"
علي كان يطالعها بقهر ومب متحمل صوتها ولأول مرة في حياته يمد إيده عليها حتى انه ياسمين سكتت من الصدمة .. وما قالت شي.. نشعها علي من شعرها وخلاها توقف غصبن عنها وقال لها وهو شوي وبيذبحها: " من اليوم ورايح هالدلع بتودرينه وبتسمعين كلامي وبتنفذينه.. تفهمين؟؟"

ياسمين كانت تطالعه برعب وإيدها على شعرها اللي تحس انه بينجلع من الجذور.. ويوم ما ردت عليه شدها علي من شعرها بقوة اكبر وعاد سؤاله: "تفهمين؟"
ياسمين (بين دموعها): " آاااي!!.. هيه.. ان شالله.."
علي: " عبدالله بتشوفينه يوم انا بقرر هالشي.. وان حطيتي في بالج تردين له بذبحج بيديه الثنتين.. مب ناقص الا انتي بعد تهدمين كل اللي بنيته للحين.."
اطالعته ياسمين بصدمة وهو يطلع من غرفتها ويصك الباب وراه بقوة .. أبوها أول مرة يعاملها جي.. حست بوحدة فظيعة وهي تطالع الباب .. ولأول مرة من يوم تطلقت تحس ياسمين بالندم على قرارها.. وبتعب.. وهي بعدها تصيح تمددت ياسمين على شبريتها وحظنت المخدة وابتدت تصيح بقوة وهي تفكر باللي ممكن يستوي بعبدالله..
.
.
نهاية الجزء السابع والعشرون
.
.

.


الجزء الثامن والعشرون






" أكره الانتظار! وأكره تيلفوني يوم ما يطيع يرن..! "


تنهدت موزة بملل وطاحت على شبرية لطيفة وهي تطالع شاشة موبايلها بقهر.. وكملت رمستها اللي مأذية بها اختها من ساعة ونص ألحين.. " محد يفكر يتصل بي.. ولا حتى مسج .. إلا من أمارات كول طبعا!!.. وين راحن ربيعاتي؟؟ شو السالفة؟ نسن انه عندهن ربيعة اسمها موزة؟؟"


لطيفة (وعيونها على شاشة الكمبيوتر): " الحين بتظايجين بعمرج عشان شي تافه مثل هذا؟"


موزة: "شي تافه صح.. بس في نفس الوقت يخليني احس بأهميتي عند غيري.."


لطيفة: " قصدج اهميتج عند ليلوه.."


موزة: " أنا ما يبت طاري ليلوه.."


لطيفة : " اااه موزووه انتي هالحفلة كلها اللي مسوتنها بسبة ليلى .. حاسة بالذنب لأنج من يومين ما رمستيها.."


موزة: "وليش أحس بالذنب؟ هي اللي ما كلفت على نفسها وفكرت تتصل بي"


لطيفة: " يمكن انشغلت.."


موزة (وهي تنش وتسير صوب الدريشة): "ويمكن حاسة بغلطتها ومستحية.."


فصخت لطيفة نظارتها واطالعت اختها وقالت: " ليلى ما غلطت.. لا توهمين نفسج بإنج الظحية.."



موزة كانت واقفة عند الدريشة تطالع الجو الربيعي الرائع اللي برى وتحس ببرودة شديدة تسري في ظلوعها.. مهما حاولت تقاوم هالمشاعر اللي في داخلها بس بعدها حاسة بالخيانة من ليلى.. وبعده قلبها ينعصر من الغيرة كل ما فكرت بمبارك وهو واقف في المكتب ويطالع ليلى.. ويسولف وياها.. تعرف انه مشاعرها انانية وسخيفة وتعرف انه ليلى نيتها صافية بس بعد تعرف انه هالاحاسيس اللي استقرت في قلبها من يومين مستحيل تتغير أو تختفي بهالسهولة..


لطيفة اقتربت منها ووقفت وياها تطالع الحديقة وسألتها فجأة: " منو الأهم بالنسبة لج .. ليلى ولا مبارك؟"


موزة تنهدت وجاوبتها بسرعة: "تعرفين اجابتي على هالسؤال .. أكيد ليلى.."


لطيفة: " أنا ما ابا اجابة مني والدرب.. فكري زين.. منو الأهم؟ "


موزة: "قلت لج ليلى هي الأهم.."


لطيفة: "يعني لو يا مبارك وخطبج وفي يوم من الايام قال لج لا ترمسين ليلى لأني ما ادانيها.. بطيعينه؟"


موزة:" على فكرة سؤال غبي بس بجاوبج.. ساعتها بيكون مبارك خطيبي ولازم اسمع كلامه اوكى؟"


لطيفة: "لا مب لازم.. بس انتي الحين بينتي لي انه مبارك هو الاهم في حياتج.."


اطالعتها موزة بنظرة حادة وقالت: " مب على كيفج تقررين هالشي!"


لطيفة: "عيل ليش مب رايمة ترمسين ليلى؟"


موزة: "برمسها الحين وبتشوفين انه عادي!"


سارت موزة صوب الشبرية وشلت موبايلها عشان تتصل بليلى ولطيفة كانت تطالعها بخبث وتبتسم.. كانت تعرف انها اذا استفزت موزة أكيد بتتصل بليلى وبينتهي هالخلاف الغبي اللي من طرف واحد..




ليلى في هالوقت كانت يالسة تراقب شمسة وهي راقدة وتبتسم وتفكر بكل اللي استوى لها في هالأيام اللي مرت عليها.. رغم الساعات القليلة اللي مرت عليها وهي في الشركة إلا انه مجرد وجودها هناك خلاها تحس بأحاسيس مختلفة وحلوة وايد.. حبت كل شي في الشركة.. الديكورات .. روان.. الملفات والشغل وجو الاثارة والتجديد اللي عاشته.. حتى موقف مبارك السخيف وياها حبته.. وضحكت الحين وهي تتذكره.. بينها وبين نفسها اعترفت انه فعلا وسيم وما لامت موزة يوم انها انعجبت فيه.. بس وقاحته وغروره هم اللي مخربين عليه .. في كل موقف جمعها وياه كانت ليلى تقتنع أكثر وأكثر بإنه هالانسان فعلا في منتهى الغرور وقلة الأدب. وتساءلت ليلى بينها وبين نفسها إذا كان هالغرور نابع من داخله.. ولا مجرد قناع يواجه به العالم ويعتمد عليه عشان يكون قوي؟
عقدت ليلى حياتها وضحكت ضحكة عصبية وهي تقول في داخله" الحين انا ما لقيت الا هذا اشغل بالي وافكر فيه؟" وردت تتأمل ملامح الطفلة اللي لفتها بالشال الوردي قبل شوي ورقدتها على شبريتها.. شمسة كانت مثل الملاك.. عمرها 20 يوم بس وملامحها في غاية الجمال وكل اللي شافها أو لمحها على طول حبها .. ومن الحين كان واضح جدا انها تشبه أمها ياسمين وهالشي بدل لا يظايج ليلى بالعكس فرحها لأنه ياسمين رغم كل عيوبها الا انها كانت في غاية الجمال.. والظاهر انه شمسة بتكون حتى أحلى عنها..
انتبهت ليلى من أفكارها على صوت الموبايل اللي اهتز وهو على طرف المخدة وشلته ليلى بهدوء ونشت عن الشبرية وهي تطالع الرقم.. وابتسمت وهي ترد عليه بدلع..
ليلى: " ألوووه؟"
موزة (بتوتر):" مرحبااا.."
ليلى: " لا ترمسيني ولا تحاولين تبررين لي موقفج.."
موزة: "ههههه أفاااا.. ليش عاده؟"
ليلى: " يومين ما تسألين عني ولا حتى تردين على موبايلج يوم ادق لج؟"
موزة: " ليلوه دقيتي لي مرة وحدة بس.."
ليلى: "أوكى وليش ما رديتي ادقين؟"
موزة: " انشغلت.."
ليلى: " في شو؟"
موزة: " أشغال هني في البيت.. انتي شحالج؟"
ليلى: " الحمدلله بخيير متولهة عليج وايد.."
موزة: " حتى انا حبيبتي.."
ليلى: " ما بتين عندي؟"
موزة: "اممم كنت افكر بهالشي.. بس امايه ما بتخليني اتم وايد امس هازبتنا وتقول إنا مول ما نيلس في البيت.. "
ليلى: " ههههه فديتها والله.."
موزة:" اسمعي انا باي جي ربع ساعة لأنه في بالي شي أبا اسويه.."
ليلى: "شو هالشي؟"
موزة: " بصور baby شمسة عشان أرسمها.."
ليلى (بفرح): " صدق؟؟ بترسمينها؟"
موزة: "هيه بتكون هدية حلوة تعطينها لعمج يوم بينش بالسلامة.."
ليلى: " حبيبتي يا موزوه والله you're the best "
موزة: "إحم إحم.. ادري ادري ما يحتاي تقولين.."
ليلى:" ههههههه.. اترياج اتين لا تتأخرين.. "
موزة:" اوكى ساعة بالكثير وبكون عندج.."
بندت ليلى عن ربيعتها وهي تبتسم وقالت لشمسة اللي كانت راقدة بكل براءة.. " منو قدج شموس؟ بيرسمونج.. أنا ربيعتها من سنة وشوي وما فكرت ترسمني وانتي توها تعرفج وشوفي المعاملة الخاصة..!" وباستها على خدها بسرعة وسارت صوب الكبت عشان تبدل البيجاما اللي كانت لابستنها
.

.
عيونها كانت على شاشة التلفزيون ودموعها صار لها ساعتين وهي مغرقة ويهها.. وعلى شاشة الإم بي سي حفلة محمد عبده اللي من ابتدت وياسمين تحاول تسيطر على دموعها بس مب قادرة.. عبدالله ما كان يسمع الا محمد عبده وكل اغنية من الاغاني اللي يغنيها في هالحفلة كانت لها ذكرى في بال ياسمين.. وخصوصا الاغنية اللي كان يغنيها في هاللحظة.. " يا ما جددت الأماني في غيابك.. ويا ما رددت الأغاني في عتابك.. كنت من شوقي إليك.. أحسب اني بين إيديك!.. ولما جت عيني عليك.. وبانت الحيرة عليك.. صرت أترجى دموعي.. لا تبين له خضوعي!" هالاغنية وهالمقطع بالذات كان عبدالله وايد يحبه ومن كثر ما كان يحبها تعلمت ياسمين انها تحبه بعد.. كانت مصدومة بهالاكتشاف اللي اكتشفته.. انها تحب تسمع اغاني محمد عبده وهي اللي كانت تظايج منهن قبل وتعتبرهن مملات.. وهذا مب الاكتشاف الوحيد اللي اكتشفته ياسمين من يوم عرفت انه عبدالله في غيبوبة.. فجأة اكتشفت انها متولهة عليه وانها حاسة بالاختناق من دونه.. حاسة بالفراغ والوحدة وبشي ثاني مب قادرة تفهمه..
التفتت ياسمين وراها واطالعت شبريتها وعيونها تبين الجرح اللي تحس به في داخلها.. ونشت من مكانها وتمددت على الشبرية ومدت ايدها تحت المخدة وطلعت الشي اللي احتفظت به تحتها طول الاسبوعين اللي مروا عليها وهي هني.. كان قميص بنتها شمسة اللي لبسته يوم يابتها ياسمين البيت.. لقته في غرفتها عقب ما روح عنها عبدالله يوم الجمعة المشئوم واحتفظت به تحت المخدة بدون تردد..
رفعت ياسمين القميص وحطته على ويهها واستنشقت ريحة بنتها اللي كانت عالقة في القميص وحست بالدموع تتيمع في عيونها مرة ثانية .. رغم انها ما تبا تعترف بهالشي بس بنتها وايد كانت واحشتنها وحاسة بألم فظيع في قلبها من دونها.. مب عارفة ترمس منو أو تعبر عن مشاعرها بأي طريقة.. تعرف انها غلطت غلطة العمر يوم تخلت عنها بس ما في أي مجال انها تصلح غلطتها الحين.. خصوصا انه عبدالله في المستشفى بسببها هي..
تكورت ياسمين على الشبرية ويلست تصيح بكل قوتها وهي حاظنة القميص الوردي الناعم .. كانت تصيح كل اللي ظيعته من إيدها وكل اللي كان ممكن يصير وحطمته بأنانيتها..



تحت في الصالة، كانت نهلة واقفة ترمس علي بن يمعة وملامح ويهها معتفسة من الخاطر والظيج باين عليها
علي (بقلق واضح): " رمسيها وخليها تظهر من الغرفة.. من يومين ما كلت شي ولا طاعت تبطل الباب"
نهلة: " عمي شو تتوقع منها عقب ما صفعتها؟"
علي: " قهرتني .. قامت تزاعج يوم خبرتها انه عبدالله في المستشفى.. انا مب قاصد اظربها هي تعرف مكانها في قلبي وانتي تعرفين بعد .."
نهلة: "أعرف عمي اعرف.. (تتنهد) انا بسير اشوفها بس ان شالله اطيع تبطل الباب "
علي: " انا بترياج هني تحت.."
ابتسمت له نهلة وركبت الدري وهي تفكر بربيعتها اللي انجلبت حياتها 180 درجة في خلال 20 يوم بس.. نهلة كانت وايد مقهورة من ياسمين ومن القرارات اللي اتخذتها في هالفترة وكانت مب ناوية ترمسها عشان تأدبها.. بس يوم اتصل بها علي بن يمعة اليوم وخبرها انه ياسمين تعبانة ما رامت تكابر اكثر ويتها على طول.. ويوم وقفت عند باب غرفتها دقته بهدوء ونادت عليها بحنان: " ياسمين؟؟ حبيبتي بطلي الباب.."

ياسمين يوم سمعت صوت نهلة ترددت تبطل لها الباب ولا لاء.. خلال هاليومين تعودت على عزلتها وما كانت حتى تحس باليوع.. كل اللي تباه اتم بروحها وتجابل التلفزيون بس.. وموبايلها من يوم فرته في الحديقة ما تعرف عنه شي.. حالتها كانت وايد صعبة والحين وهي تسمع صوت ربيعتها حست بدوخة وكأنها وعت من حلم طويل.. ووقفت عند الباب بتردد قبل لا تبطله بأصابع ترتجف.. وأول ما شافت ويه نهلة انفجرت الدموع في عينها ولوت عليها بقوة ودشت نهلة الغرفة وهي تحاول تهدي ربيعتها..
نهلة:" حبيبتي خلاص هدي أعصابج.. والله حرام اللي تسوينه في عمرج!"
ياسمين (تزاعج): " أبا بنتي.. نهلوه أبا بنتي.. وعبادي..مابا اتم هني مابا.. مابا.. مابا!!!"
وردت تصيح مرة ثانية ونهلة لاوية عليها وتمسح على شعرها وهي مب عارفة شو تقول لها عشان تخفف عنها.. لأنها تعرف ومتأكدة انه اللي انهدم في حياة ياسمين مستحيل انه يتصلح..
.
.


.

"وشو دراك انه ولدك يالخديه؟؟"


سؤال صالحة نزل على راس فهد مثل الصاعقة.. رغم انه هذا هو الشي الوحيد اللي كان يفكر فيه طول الاسبوع اللي مر عليه وهو يعرف عن حمل مرته بس لأنه هالافكار كانت في داخله ما كانت وايد مأثرة عليه والحين يوم تجسدت أفكاره في كلمات أمه وسمع سؤالها ما قدر يخبي الغضب اللي بان في عيونه..


فهد: " أمايه انتي شو تقولين؟"


صالحة (تقلد صوته باستهزاء): " "أمايه انتي شو تقولين؟ .. أنا ابا اعرف شو اللي مخلنك تستحملها للحين.. من زينها ولا من زين سمعتها؟ خلها تلتعن بيت اهلها وانا بزوجك ليلى بنت اختي.. "


تنهد فهد بتعب وهو يطالع الصوب الثاني ويحاول انه ما يعصب


صالحة: " يوم قلت لك بخطب لك ليلى ما طعت.. ما بغيت الا هالخايسة شيخوه.. وشوف شو سوت بك."


فهد: " امايه انا ليلى ماباها.. ولا عمري فكرت بها .. وشيخوه غلطت والحين.."


صالحة: " غلطت؟؟؟ بس؟؟ هذا اللي طلع منك؟؟ هيييييييه ظاعوا الرياييل!! ظاعوا الرياييل من عقبك يا بو فهد.. "


فهد: " يعني ما بكون ريال في عينج الا اذا طلقتها؟؟ "


صالحة: " هيه يوم انك ما رمت تذبحها ع الاقل طلقها..!!"


فهد: " بس أنا.."


صالحة: " طلقها شو تبا فيها بعد؟؟ "


فهد: " امي قلت لج شويخ حامل!!"


صالحة: " وعشان جي لازم اطلقها!!.. تراها وياك من اربع سنين .. ما حملت.. انته ما فيك مخ؟؟ ما تفكر؟"


فهد: "حرام اظلمها امايه .. استغفري ربج!!"


قامت صالحة عنه وهي تقول: " هاي مسوية لك عمل.. "


اطالعها فهد بتعب وردت تقول: " هيه نعم مسوية لك عمل.. ولا ما بتسكت عنها هالكثر.. "


فهد: " امايه والله تعبت من هالسالفة كلها ولاعت جبدي.. خلاص عاد والله ابا ارتاح.."


صالحة: " طيعني ولو مرة وحدة في حياتك وصدقني بترتاح.."


وقف فهد وقال لها : " خلاص سوي اللي تبينه تبين تخطبين لي ليلى اخطبيها بس شيخوه ما بطلقها وهي حامل.."


صالحة (وهي مرتاحة جزئيا لأنه وافق ع الطلاق): " خلاص أول ما تربي هالعلة اطلقها على طول.. والياهل أنا بربيه!"



كانت هاي هي الجملة اللي سمعتها شيخة وهي نازلة من الدري عشان تيلس وياهم في الصالة ، ومن كثر ما كانت مصدومة من اللي سمعته ما انتبهت انها داست على طرف جلابيتها الطويلة وما وعت بعمرها الا وهي تتجلب على الدري وتصرخ بأعلى حسها


.


.
.


في غرفة البنات، كانت شنط المدرسة الوردية والبنفسجية على الأرض والكتب والدفاتر في كل مكان.. وعلى الطاولة الوردية الصغيرة صحنين كيك وسندويتشات وأكواب عصير فراولة.. وع المخدات الكبيرة اللي عند الطاولة يلست سارة تسولف ويا مزنة وأمولة عن المدرسة والأبلوات والكارتون اللي يتابعونه يوميا..


الساعة كانت خمس العصر والجو ربيعي رائع برى ، رغم هذا فضلوا هالثلاثة هدوء الغرفة عشان يذاكرون فيه وخلوا الحديقة اليوم لخالد اللي كان ربيعه سلطان عنده ويلعبون برى..



سارة: "علينا إملاء انجليزي باجر .. مزنوه لا يكون نسيتي؟"


مزنة: " ما نسيت.. كتبت الكلمات ع المسطرة من ورا.. ما فيه احفظهن.."


سارة: " ما تخافين من مس إلهام؟ "


مزنة: "هاي غبية نحن نمتحن وهي تقرا المجلة.. ما تطالع والله خسارة ندرس ونتعب عمارنا.."


أمل: " أنا بعد عندي إملاء باجر.."


مزنة (باحتقار): " الحين انتي تقارنين صف ثاني السهل بصف ثالث؟؟ والله ما عندج سالفة"


أمل (بنفس اللهجة): " والله انا عقلي بعده صغيرون وصف ثاني صعب عليه أوكى؟"


مزنة: " أنا يوم كنت صف ثاني ما كنت ادرس مول.. كله كان سهل.. "


سارة: " امبلى كنتي تدرسين.. كل يوم اتين بيتنا ونحفظ الكلمات.."


مزنة: " عن الجذب ساروه!"


سارة: " أنا مب جذابة!!"


أمل (وهي تشل قطعة كيك كبيرة وادخلها كلها في حلجها): " مزنوه اصلا انتي أكبر جذابة في الدنيا كلها.."


قبل لا ترد عليها مزنة تبطل الباب فجأة ودخل عليهم مايد وهو لابس كاب وتي شيرت وشورت.. واطالعهن بنظرات خبيثة وردن البنات عليه بنظرات استفهام وتعجب..


مايد: " بسكن من الدراسة يالدحيحات والله أوراق الكتب تقطعت من كثر ما تجلبن فيها.. "


مزنة: "وانته ما لقيت غيرنا في هالبيت كله عشان تتسيخف عليه؟"


مايد: " جب انتي.. كلمة ثانية وباخذ عنج الموبايل.."


اطالعته مزنة بقهر وسكتت.. وضحك عليها مايد وهو يشل صحن الكيك من جدامها وياكل منه وقال: " قومن تلبسن.."


أمل: "بنطلع؟"


مايد: " هيه بنسير نسوي رياضة.. خل نعدل من أشكالكن كل وحدة فيكن مستوية درام.. !"


اعترضت سارة وقالت : "أنا مب وايد دبدوبة!!"


مايد: "فديتج انتي رشيقة مب لازم اتين ويانا بس هالفيلة اللي حذالج لازم يرحمن عمارهن شوي.."


أمل ما اهتمت لرمسته، كانت وايد مستانسة انها بتظهر وركضت صوب الكبت عشان اطلع لها بنطلون وتي شيرت.. ومزنة اطالعته بنص عين وقالت له: " أنا جسمي عايبني !"


مايد (بنبرة حادة): "بس انا مب عايبني .. فزي قومي اشوف !! جدامي ياللا!"



نشت مزنة وهي تتأفف وسارت صوب الكبت ادور لها بنطلون تلبسه ومايد شل صحن السندويتشات والكيك وسار الصالة عشان ياكل ويترياهن يطلعن.. هاي أول مرة يفكر انه يطلع ويركض فيها بس صدق كان محتاج انه يشغل نفسه ويبعد افكاره عن هالبنية اللي احتلت تفكيره من يومين.. لأول مرة في حياته ينشغل بال مايد على وحدة بهالطريقة.. ما ينكر انه عيبته أكثر من وحدة في الفترة الاخيرة ومنهن عليا بنت خالوته.. بس هاي رغم انه جمالها وايد عادي فيها شي سحره على طول..


مايد كان يعرف انه هالبنية هي لطيفة اخت موزة، وجايفنها من قبل في بيتهم بس هالمرة يوم جافها في المول والتقت عيونهم حس انها كانت النظرة الأولى بينهم.. وابتدت تتجمع في داخله كل المشاعر السخيفة اللي كان يضحك على مروان ربيعه يوم يطريها..


تنهد مايد وهو يلتهم كيك الأناناس اللي في إيده وجاف ليلى نازلة من فوق وفي إيدها المدخن.. وقرر يسألها عن هالبنية..


مايد: " ليلوتي؟"


ليلى (تلتفت له): " ها حبيبي.."


مايد: " ربيعتج موزة عندها اخت في الثانوية صح؟"


استغربت ليلى من سؤاله: " هيه.. ليش؟"


مايد (بثقة): " ويايه في ثاني ثانوي؟"


ليلى: " هييه.. بس ليش هالسؤال؟"


مايد: " ولا شي بس إذا كانت ويايه في أدبي كنت أبا ملف الانجاز مال مادة الفيزيا لأني مب عارف شو أسوي وباخذ منها أفكار.."


سارت ليلى صوب المطبخ وهي تقول بصوت عالي: " ما ينفع.. لطوف في علمي وما اظن عندهم ملف انجاز"


ابتسم مايد.. اسمها لطيفة.. حلو!.. وقال بصوت عالي: " هيييه برايها عيل مب لازم.. بخربط أي شي من عندي.."


في هاللحظة نزلن أمل ومزنة من فوق وركضن صوب مايد اللي فر الكاب ع القنفة وطلع وياهن برى عشان يركضون في الفريج.. وأول ما طلعوا شافوا خالد وسلطان في ويوههم.. وخالد كان بيطير من الوناسة.. وشال السلحفاة العودة في حظنه وسلطان وراه وفي إيده بيض كبير..


خالد: " ميود بقول لك شي.."


مايد: "خير؟"


خالد (بابتسامة عريضة): " الحمسة سوت بيض داخل الحفرة وأنا وسلطان شفناها ويبنا البيض.."


مد سلطان ايده بفخر وقال: " أكبر من بيض الدياي.. "


مايد عيونه كانن على البيض اللي في إيد سلطان وماسك اعصابه عشان لا يذبحهم.. وقال بنبرة حادة وهو ياخذ البيض: " أنا الف مرة قايل لك يا خلود لا تقترب من سلاحفي.. وانته سلطوون.. ألحين بيأذن المغرب ياللا روح بيتكم..!"


سلطان عطاه البيض بخوف وهو يفكر انه مايد للحين بعده ما شاف شي وعصب جي عيل لو شاف اللي استوى صوب النافورة شو بيسوي؟ وخالد يوم سمع اخوه محتشر فر السلحفاة ع الارض وركض داخل عند ليلى وسلطان وراه.. ومايد على طول حس انه السالفة فيها إن ويوم سار صوب النافورة انصدم انه نص البيض كان مكسور ووحدة من السلاحف مطلعينها من داخل الدرع العظمي اللي على ظهرها وفارينها ع الارض جي..


مايد أول ما شاف هالمشهد رد البيض في الحفرة وركض بسرعة داخل عشان يأدب هالمجرمين ، في الوقت اللي أمل ومزنة يلسوا حذال السلحفاة المسكينة يطالعونها ويحاولون يفكرون بطريقة عشان يردونها داخل..


مزنة: " والله خلود شاطر.. أنا من زمان خاطري اشوف كيف شكل السلحفاة بدون بيتها.."


أمل: " ههههههههه شكلها يضحك فصخوها مسكينة.."


مزنة (وهي تلتفت لباب البيت): " ميود شكله نسانا.."


أمل: " أحسن بعد .. ما اروم اركض.. بطني متروس.."


بس للأسف ما تحققت امنيتهم لأنهم عقب ثواني سمعوا صوت خالد وسلطان وهم يصيحون داخل وطلع لهم مايد وعلى ويهه ابتسامة نصر وزقرهن من بعيد..


مايد: " ياللا تعالن بسرعة قبل لا تطلع ليلوه.. "


ونشت مزنة ووراها أمل وركضن صوب مايد

.


عقب ما هدت ياسمين وشربت العصير اللي يابت لها اياه الخدامة استسلمت لنهلة اللي كانت تسحي شعرها الطويل وترمسها.. ياسمين كانت تحس بالاسترخاء من عقب ما طلعت حرتها وصاحت في حضن نهلة وتحس انه الافكار اللي كانت تتزاحم في عقلها بدت تخف وتتلاشى شوي شوي.. ونهلة استانست لأنه ياسمين سمعت كلامها وكلت السندويتشات اللي سوتهن لها .. واطمنت يوم حست انه اللون رد لخدودها..


نهلة: " شو تحسين الحين حبيبتي؟"


ياسمين: " راسي يعورني.."


نهلة: "لازم من الصياح وقلة الاكل.."


ياسمين: "بس بعد حاسة براحة.."


نهلة: "انزين ممكن تنزلين ويايه تحت؟ أبوج حليله يحاتيج"


نزلت ياسمين عيونها وقالت بغضب: " مابا اجوفه.. "


نهلة: " ياسمين عاد!!! عن الدلع!"


ياسمين: " انتي ما جفتي كيف ظربني!.. أول مرة يعاملني جي وانا مستحيل أسامحه"


نهلة: "حبيبتي اعذريه.. انتي تعرفين الظروف اللي يمر بها.. أكيد فقد اعصابه.."


اطالعتها ياسمين بقهر ونشت عنها وتمت تمشي في الغرفة بعصبية وهي تقول: " وظروفي انا؟؟ محد هامتنه ظروفي!!.. شو من ظروف عنده ابويه خبريني؟؟ شو هالظروف اللي تخليه يمد ايده عليه ويظربني؟"


اطالعتها نهلة بظيج وقالت: " انتي ما تعرفين؟"


ياسمين: " شو؟؟ "


نهلة: " أبوج يواجه قضية عودة.. وإذا ما دفع اللي عليه .. يمكن 700 ألف درهم وفوق.. بيواجه السجن لمدة 3 سنوات.."


اطالعتها ياسمين بنظرة خالية من الاحساس.. مب مستوعبة اللي يالسة تقوله.. وضحكت بعصبية وهي تقول: "أوكى وين المشكلة؟؟ أبويه مليونير.. ما بيغلبه هالمبلغ البسيط.."


نشت نهلة من مكانها وتمت تطالع ياسمين بظيج.. الظاهر انها ما تعرف أي شي عن وضع ابوها الحالي.. وقالت عقب تردد كبير: " ياسمين.. أبوج .. امم.. انتي ما قريتي الجرايد؟"


ياسمين(وعلامات القلق بادية تظهر على ويهها): " تعرفين اني ما اقرا جرايد شو السالفة؟"


نهلة: " عمي علي.. جريب بيعلن افلاسه.."


يلست ياسمين من الصدمة وتمت تتنفس بصوت عالي وبسرعة.. وما قدرت تحط عينها في عين ربيعتها.. ونهلة قررت تخبرها بكل شي مرة وحدة عشان ما تصدمها مرتين..


نهلة: " تحيدين الأسهم اللي اشتراهن قبل ثلاث سنين؟؟ خسر فيهن.. والفنادق صكوهن وما عنده مصدر ارباح من شهر الحين.. غير انه.."


"شو بعد؟" سألتها ياسمين وهي تطالعها بنظرة حادة


نهلة: " أبوج دخل نص ثروته في شراكة ويا رجل اعمال مصري.. والشهر اللي طاف هالريال اختلس كل البيزات واختفى من الامارات.."


مع آخر كلمة نطقتها نهلة تفجرت الدموع اللي كانت محبوسة في عيون ياسمين مرة ثانية وبسرعة سارت لها نهلة ولوت عليها.. وياسمين تسألها بين دموعها: "ليش؟؟ ليش ما خبرني؟؟ كنت بساعده.. عبدالله كان بيوقف وياه.. ليش؟"


نهلة: " انتي تعرفين ابوج.. ما يحب يبين فشله جدامج.. انتي تعرفين كم كثر يحبج.. ما يحتاي اخبرج بهالشي.."


ياسمين: "شو بنسوي الحين؟؟ شو بنسوي نهلووه.. مابا ابويه يتلعوز.. وانا كيف بعيش؟؟"


تذكرت نهلة رمسة علي بن يمعة وعضت على شفايفها وهي تقول: " اممم... في حل.."


ياسمين: "شو؟؟"


نهلة: " اذا عبدالله عطاج فيلا العين اليديدة.. وباعها ابوج.."


ياسمين: "نعم؟؟ يبيعها؟؟ هاي فيلتي!!.. نهلة انتي شو تقولين؟؟!"


نهلة: " وهذا أبوج.. "


غطت ياسمين ويهها بأياديها وحاولت انها تزاعج على ربيعتها .. كل اللي سمعته توه من نهلة كان صدمة كبيرة بالنسبة لها.. رغم كثرة عيوب ياسمين الا انها تحب ابوها لدرجة الجنون ومستحيل ترضى انه ينسجن او يتلعوز ويا الديون.. وهي تعرف انه الفيلا ويا الأثاث قيمتها اكثر من مليونين درهم.. بس معقولة؟ عقب ما لقت القصر اللي كانت تحلم تكون أميرته طول هالسنين .. معقولة تتخلى عنه بهالسهولة؟


.
.


في المستشفى كان الجو متوتر جدا وفهد وأمه يالسين يتريون الدكتورة تطلع واطمنهم على شيخة والجنين.. فهد كان مب عارف يفكر .. كل شي استوى بسرعة.. شيخة طاحت وفقدت الوعي واضطر اييبها هني المستشفى بروحه من كثر خوفه عليها لأنه ما رام يتريا الاسعاف.. وغير خوفه عليها كانت رمسة امه تتردد في باله في كل ثانية.. ونظراتها له الحين محيرتنه أكثر.. مب عارف شو القرار اللي لازم يتخذه..في نظره ، انه يسامح شيخة قوة مب ضعف في شخصيته.. بس في نظر المجتمع والناس ضعف ونقص في الرجولة.. وبينه وبين نفسه.. فهد كان يعرف انه الشكوك بتم دوم حفرة كبيرة وعميقة بينه وبين مرته.. أي حياة اللي كان ناوي يعيشها وياها؟ وأي استقرار اللي بيحس به وهو يفكر بماضيها في كل دقيقة وثانية تمر عليه؟



انتشلته النيرس من أفكاره يوم طلعت من الغرفة اللي في قسم الطوارئ والتعب باين على ملامحها.. فهد أول ما شافها سار لها وبدون ما يسألها قالت له: " Madam is fine.. but the baby is gone.. am really sorry Sir" ( المدام بخير.. بس فقدنا الجنين.. )


اطالعها فهد بألم والتفت على امه اللي كانت يالسة على الكرسي وتطالعه هو والنيرس..


صالحة: " شو قالت لك؟؟ شو استوى بها؟"


تنهد فهد ومشى عن أمه .. كان يحس انه مخنوق ويبا يتنفس ويفكر بهدوء.. وصالحة وقفت ومشت وراه وهي تنادي عليه: "فهد!!.. وين ساير؟ شو قالت لك النيرس؟"


طنشها فهد وطلع من القسم ووقفت صالحة تطالعه باستغراب.. وقررت تتريا النيرس لين ترد عشان تسألها.. أما فهد فأول ما طلع ووصل الباركنات طلع الجيكارة من مخباه ووقف يستنشق دخانها بعمق وبسرعة عشان يهدي من نبضات قلبه المتسارعة.. سنين.. سنين وهو يتريا هالياهل.. يحلم باللحظة اللي يبشرونه فيها انه مرته حامل وبتييب له الطفل اللي يحمل ملامحه وملامحها .. سنين وهو يشتغل ليل نهار عشان يكون نفسه ويوفر لها حياة مستقرة .. وفي الأخير يوم تحقق حلمه ، يتبخر حتى قبل لا يلمسه ويحس به.. وكله بسببها.. بسبب شيخة..


فر فهد الجيكارة ع الارض وداسها بنعاله بقوة.. اليوم اتخذ قراره..


وبدون أي تردد بينفذه

.


في نفس الفريج اللي كان يلعب فيه وهو ياهل ويا مترف.. وفي نفس الشارع اللي شهد ضحكاتهم وألعابهم ومغامراتهم هو ومحمد وليلى، كان مايد يمشي ويا مزنة وأمل .. كل واحد فيهم ساكت وغرقان في أفكاره.. كانوا يمشون بصمت وهم رادين البيت .. مزنة وأمل ساكتات من التعب عقب ما ركضهن مايد مسافة طويلة جدا.. ومايد ساكت احتراما لأشباح الماضي اللي كانت تتجسد وتظهر له في كل خطوة يمشيها..


التفتت له مزنة وهي تمسح العرق عن ويهها بطرف قميصها وشافت نظرة الألم اللي في عيونه.. وتجمدت الكلمات اللي كانت بتقولهن على شفايفها.. حتى مزنة.. بطفولتها .. عرفت في داخلها انها المفروض ما تكلمه الحين ولا تحاول انها تدخل في افكاره.. وعشان جي ردت تطالع جدامها وكملت دربها بتعب للبيت..


مايد رد بذاكرته لست سنين ورا.. ليوم مثل هاليوم.. وقف فيه هو وأبوه برى يطيرون طياراتهم الورقية .. الحارة كانت متروسة يهال يلعبون برى ومايد كان مستانس وايد انه هو الوحيد اللي كان أبوه متفيج يلعب وياه طول فترة العصر.. تنفس مايد بعمق وهو يمشي بسرعة اكبر.. يذكر ضحكته العالية هذاك اليوم يوم امه عصبت عليه هو وأبوه لأنهم دخلوا الصالة بنعلهم وخيسوا الفراش بالرمل.. يذكر ضحكهم ولعبهم في الفندق في الجاكوزي في آخر يوم شاف في أبوه .. في آخر يوم.. ااخ بس لو كان يعرف انها بتكون المرة الاخيرة اللي يشوفه فيها..


وفجأة


ردت كل الذكريات تدفق وحدة ورا الثانية ..


الضحكات.. والكلمات..


سفراتهم ولعبهم وسهرهم..


كله راح.. ومستحيل اللي راح يرد مرة ثانية..



وصل مايد للبيت وهو مب قادر يتنفس ، وما انتبه أبد للسيارة اللي كانت مبركنة عند باب البيت.. دخل بسرعة داخل . كان يبا يوصل غرفته وييلس بروحه، ومزنة وأمل أول ما وصلن الحديقة عقن عمارهن على الكراسي من التعب..


وفي السيارة برى.. كانت لطيفة يالسة تتريا اختها اللي قالت ما بتطول عند ليلى.. ويوم وصل مايد البيت شافته.. كان شكله يجنن.. شعره طويل شوي ولاصق بويهه ورقبته من الحر اللي برى.. وسمارته خفيفة وحلوة.. وعيونه فيها شي غريب.. ما قدرت لطيفة تكتشفه.. بس حست من مشيته وملامح ويهه انه متظايج وايد.. وتساءلت بينها وبين نفسها اذا كانت عليا هي سبب ظيجه..


هالفكرة يابت لها الكآبة.. وتنهدت بحزن وهي ترد تقرا الكتاب اللي في إيدها



.


ليلى في غرفتها كانت يالسة تطالع موزة اللي كانت تصور شمسة وهي تبتسم لها بحنان.. وموزة تبتسم وبالها مشغول بأفكار وايدة.. تفكر بسؤال لطيفة لها .. منو الأهم في حياتها .. ليلى ولا مبارك؟ مساعة عصبت وهي تسمع السؤال.. بس الحين.. ردت تفكر فيه مرة ثانية وبصدق.. موزة تحب ربيعتها وايد.. ليلى بالنسبة لها اخت.. وأكثر.. بس الحين.. يوم راجعت أولوياتها.. ورغم كل الحب اللي في قلبها لليلى.. كانت متأكدة انه مبارك لو وقف من بينهم.. موزة بتختاره.. رغم كل شي ورغم انها حاولت تكابر وتبعد هالاحتمال عن بالها بس هي تعرف في داخلها انها لو كان لها الاختيار بتختاره.. مب بإيدها .. موزة كانت فعلا تحبه.. وأمنيتها الوحيدة صارت انها تكون وياه..


ليلى: " بترسمينها بالفحم؟"


انتفضت موزة يوم سمعت صوت ليلى وحست بإحساس غريب يسبه الخيانة.. وما قدرت تحط عينها في عين ليلى وهي تجاوب واخفت عيونها ورا كاميرتها عشان ما تلتقي نظراتهن..


موزة: "ما قررت.. للحين.."


ليلى: " جي ولا جي اكيد بتكون اللوحة ابداع يديد من إبداعاتج.."


ابتسمت لها موزة بتوتر وقالت: " ياللا حبيبتي انا بسير الحين لطيفة تترياني برى.."


ليلى: "حرام ما يلستي.."


موزة: " مستعيلة والله حبيبتي مرة ثانية ان شالله.. بحاول اخلص اللوحة هالاسبوع.."


ليلى: "أوكى.."



تقربت منها موزة عقب ما لبست عباتها وباستها على خدها بسرعة وطلعت وطلعت ليلى وراها توصلها للباب.. وهي مب حاسة بكل اللي يجول في داخل قلب ربيعتها.. وردت غرفتها وعلى ويهها ابتسامة رضا.. وهي تفكر شو ممكن تسوي.. فكرت تبطل النت وتجيك ايميلها بس في اخر لحظة غيرت رايها.. مالها نفس على حشرة المسنجر.. وعقب تفكير اطالعت الساعة وشافتها 5 ونص.. وقررت تتصل بالصحفية جلثم عشان تسألها عن التحقيق الصحفي اللي كانت تبا ليلى تصور لها اياه..


اتصلت ليلى بالرقم اللي طرشت لها اياه جلثم ع الايميل وهي تدعي ربها انه ما تكون الفرصة راحت عليها..


ويوم ردت عليها طلثم ابتسمت ليلى وهي تسلم عليها..



ليلى: "السلام عليكم والرحمة"


جلثم: "وعليكم السلام ورحمة الله وبركاته.."


ليلى: " شحالج اختي جلثم؟"


جلثم: "الحمدلله ربي يعافيج.. شحالج انتي؟"


ليلى: "ألحمدلله يسرج الحال.. طبعا ما عرفتيني.. وياج ليلى أحمد.. المصورة اللي طرشتي لها الايميل عشان التحقيق الصحفي.."


جلثم: "يا هلا والله!!.. اكيد عرفتج.. ومن زمان اترياج تتصلين بي.."


ليلى: " اسمحيلي اختي استوت لي ظروف منعتني من اني اتصل بج.. "


جلثم:" وان شالله عدت هالظروف على خير؟"


ليلى: "ان شالله تعدي هالايام على خير.. ادعيلنا .."


جلثم: "الله يسهل لج امورج ويسعدج ان شالله.. عموما العرض بعده مفتوح لج وانا فعلا اتمنى انج تكونين ويايه في هالمشروع.."


ابتسمت ليلى بسعادة وهي تقول لها: " تسلمين يالغلا .. كنت متوقعة تغيرين رايج.."


جلثم: "لا عزيزتي.. أنا ما ارضى الا بالافضل وانا شفت عندج رؤية وإبداع مب طبيعي أبدا.."


ليلى: " هذا من ذوقج عزيزتي.."


جلثم: "إنزين متى بتكونين فاضية عشان نبدا انصور؟"


ليلى: "إنتي متى ترومين اتين العين؟"


جلثم: " اممم شو رايج ورا باجر؟"


ليلى: "حلو.. اتصلي بي واكدي لي الموعد وانا بكون موجودة ان شالله.."


جلثم: "ان شالله.. "

.


في بيت علي بن يمعة ، كان علي يالس في مكتبه عقب ما صلى المغرب وجدامه ملفاته وفواتيره واالاشعارات اللي يته من المحكمة ويحاول يفكر بطريقة اطلعه من الازمة اللي هو فيها.. وفي هاللحظة دخلت ياسمين عليه المكتب واطالعته بنظرة خلته يتلخبط ويطالعها بصدمة.. نظرتها كانت تعكس كل الألم اللي كانت حابستنه في داخلها ممزوج بموجة غضب جامحة.. ما عطته فرصة انه يرمس.. قالت له بكل اندفاع وغضب: " ليش ما خبرتني انك في أزمة ومحتاج البيزات؟؟ كنت بخلي عبدالله يساعدك؟؟ ليش قصيت عليه وخليتني اطلق؟؟"


علي (بذهول): " أنا ما قصيت عليج.. أنتي بروحج كنتي تبين تطلقين منه ومب طايقتنه."


ياسمين: " بس ليش ما قلت لي!!!"


علي: " وليش اخبرج؟؟ ما با اشغل بالج ..."


ياسمين (وهي تقترب منه وتحط إيدها على المكتب بقوة): "لا والله؟؟ والحين مول مب منشغل بالي عليك؟؟ أبويه إذا كنت متوقع انه عبدالله بيحل لك مشكلتك الحين عقب ما طلقني وخذ بنته تكون غلطان!"


علي وقف وهو معصب وقال لها: " كان كل شي بينحل لو حظرتج ما عطيتيه الياهل!"


تغيرت نظرة ياسمين من الغضب للبرود التام وقالت له وهي تبتسم باحتقار: " بس هذا اللي كنت ابا اسمعه.. عشان تنقذ نفسك دمرتني وحرمتني من بنتي.. "


علي (وهو ينزل عيونه ع الاوراق): "أنا ما حرمتج منها ياسمين انتي اللي تخليتي عنها.."


يلست ياسمين بتعب على الكرسي وهي تطالع الفرغ اللي جدامها.. وتراجع أولوياتها.. وأبوها كان واقف جدامها رغم قوته وبروده اللي يحاول يظهره لها الا انه كان يرتجف.. وياسمين في ثورة غضبها كانت تحس بالشفقة عليه.. كانت تعرف انها خسرت كل شي.. وبس خلاص ما تبا تخسر أي شي ثاني.. اطالعت ابوها مرة ثانية وقالت له: " أنا بحل لك مشكلتك ابويه.. بس عقبها ما يخصك فيني.. قراراتي بتخذها بنفسي!!"


وقفت ياسمين عشان تطلع من المكتب ويوم شافت انه ابوها يبا يرد عليها قالت له: " بس إذا استوى شي في عبدالله صدقني باباه عمري ما بسامحك!! "


وطلعت من المكتب وصكت الباب وراها بقوة.. وعلي بن يمعة يلس في مكانه بارتياح.. اخيرا بنته عقلت وقررت تساعده.. هذا هو المهم الحين وعقب ما يطمن على بيزاته بيعرف كيف يراضيها



.


بطلت عايشة باب الصالة ودخلوا عيالها داخل وهم يركضون ويضحكون.. ودخلت هي عقبهم ووراها حمدان اللي كان شال باجي الاكياس وحطهم جدام الباب عشان يرد السيارة واييب الاغراض اللي هناك.. هاليوم كان وايد حلو.. عايشة شلت عيالها وودتهم هي وحمدان اخوها عشان يلعبون في Kidz play وعقب سارت الجمعية وخذت لهم اغراض للبيت ومرت المول وخذت لها ثياب وعطور وميك اب.. وعقب ما خذولهم عشا واستأجروا لهم كم فلم.. ردوا البيت وهم هلكانين وحاسين بالرضا والسعادة...


على الرغم من أنه عايشة تحمل لقب مطلقة الحين إلا انها في حياتها كلها ما حست بهالراحة والحرية.. صح كانت تحب ريلها بس عقب خيانته لها كرهته وكرهت نفسها لأنها كانت مغفلة لدرجة انها توثق به ثقة عمياء.. الحين تروم تسوي اللي هي تباه من دون ما أي احد يتحكم فيها أو يأذيها.. تروم تقص شعرها أو اطوله على كيفها من دون ما تخاف انه "خليفه " ما بتعيبه القصة اليديدة.. تروم ترقد لوقت متأخر في الاجازات من دون ما " خليفة" يقعدها من الرقاد عشان تسوي له ريوق لأنه ما يطيق اكل الخدامة.. تروم تسافر هي وعيالها واخوها في الصيف ، مب اتم محبوسة في البلاد لأنه ريلها ما يحب يسافر الا ويا ربعه.. بكل بساطة كانت حاسة بالحرية والأغرب من هذا حاسة انها ردت في العمر 10 سنين ورا.. ردت بنية صغيرة وانه هاللي وياها مب عيالها.. لا .. اخوانها الصغار..


اطالعت عايشة اخوها حمدان وهي تبتسم له بحنان وقالت: " باجر بنسير عند مهندس الديكور عشان يغير لك ديكور غرفتك.."


حمدان: "لا اتعبين عمرج .. الغرفة عايبتني جي.."


عايشة: "لا ما يستوي.. لازم غرفتك تكون احلى غرفة.. نسيت انك ريال البيت الحين..؟"


حمدان: " دومج ما تقصرين يا ام راشد.."


يات الخدامة تشل الاغراض عشان توديهم المطبخ ويلست عايشة في الصالة ويا حمدان


عايشة: " رمست حميد عشان شغلي؟"


حمدان: " هيه قال انه رمس ربيعه وبيشغلونج ان شالله شهر تسعة في وحدة من المدارس.."


عايشة:" فظيحة والله عقب هالعمر كله ابدا اشتغل.."


حمدان: "أي عمر هذا؟ عويش انتي بعدج صغيرة!.. عمرج 30 سنة يعني مب من كبرج.. وبعدين انتي مب محتاجة لها هالوظيفة واذا ما تبينها محد بيجبرج تشتغلين.. تعرفين انه ابويه ما بيقصر وياج.."


عايشة:" فديته أبويه أدري به زعل يوم ما طعت اسكن وياه انا وعيالي .. بس يا حمدان انا لازم اعتمد على نفسي.. عيالي مسئوليتي انا ولازم اتحمل هالمسئولية.."


حمدان: " اممم خليفة ما حاول يتصل بج؟"


عايشة: "ما يعرف ارقام البيت اليديدة ولا رقم موبايلي.. بس أمس شفت موتره برى عند الباب .. تم واقف شوي وعقب سار.."


حمدان: " واتظايجتي؟"


عايشة: "ظحكت.. ما عاد يهمني!!"


حمدان: "صدق؟"


عايشة: "هيه والله.. محد يهمني غير عيالي.. وصقدني بربيهم احسن تربية ومب محتاجة أي مساعدة منه او من اهله.. "


ابتسم لها حمدان وهو واثق تماما انها قد كلمتها.. وشل الريموت كنترول عشان يشغل التلفزيون .. أما عايشة فكانت هي بعد واثقة من مقدرتها على تربيتهم بروحها.. وهالوظيفة اللي حصلتها بتساعدها عشان تستقل بروحها وما تحتاج لأي حد.. وعن ربيعاتها، فاللي تحب عويش بتم وياها سواء كانت مطلقة ولا لاء.. واللي كانت تحبها عشان مظاهر اجتماعية وغيره، فعايشة أصلا مب محتاجة لها.. وحياتها من دونها بتكون احسن بوايد..


قامت عايشة وسارت تشوف عيالها اللي صوتهم ينسمع من فوق من كثر ما كانوا محتشرين.. وهي تركب ع الدري القت نظرة على بيتها.. وفي داخلها كانت تعرف.. الحياة بتكون احسن بوايد من دون خليفة.. وهي من الحين بادية تستمع فيها..


.


.

.
.
في بلكونة الصالة اللي فوق كانت سارة واقفة تطالع الشهب اللي تارسة السما الليلة.. وأمل واقفة وياها ومنبهرة باللي تشوفه.. ومايد كان بينزل تحت بس يوم شافهن سار ووقف وياهن واستانس وايد على منظر النجوم.. كانت ليلة حلوة ومزاجه اللي كان معتفس رد يعتدل وهو ويا خواته.. سارة كانت متلبسة ومستعدة انها تسير المستشفى واستانست أكثر انه أمل ما قالت تبا تسير وياهم.. تعرف انه أمل وايد شيطانة وممكن تسوي أي شي يخلي ليلى تعصب وتردهم البيت على طول..
اطالعت سارة مايد وسألته: " ميودي ليش النجمة اطيح من السما؟"
مسح مايد على خدها بإيده وقال لها وهو يبتسم: " تبا تكون جريبة منج .."
ابتسمت له سارة بخجل وسألته أمل : "وأنا؟؟"
مايد : "إنتي يوم تشوف ويهج تقول يا ليتني تميت مكاني في السما ولا نزلت لهالاشكال.."
ضحكت سارة واطالعته أمل بحقد وهي تقول: "ماااااااصخ.."
مايد: "شكرا شكرا.."
دخلت ليلى عليهم البلكونة وقالت: "ميود حرام عليك..!! ياللا امولة سيري ادرسي وارقدي اوكى حبيبي؟"
أمل (وهي تطلع من البلكونة): " أوكى.."
ليلى: "سارونا حبيبي ياللا نسير.."
مايد: " ليلوه خلوني اسير وياكم الله يخليج ابا اسير!!"
ليلى: "لاء!!.. يدوه وحليلها تعبانة وسارت ترقد.. منو بيجابل شمسة اذا حظرتك سرت ويانا؟"
مايد: " انزين انا بسير وانتي تمي ويا شمسة.."
ليلى: "مابا!!.. استوى لي يومين مب جايفتنه حرام عليك انته امس كنت عنده.."
مايد: " ما عليه بناخذ شمسة ويانا.. "
ليلى: "ميود عن الخبال انزين؟؟"
مايد: " افففف.."
ليلى: " لا تتأفف.. ميود تأدب.."
سارة (بظيج): "بنسير ولا لاء؟"
ليلى: "بنسير حبيبتي.. ياللا إشفاق يتريانا.."
اطالعهن مايد بقهر وسار غرفة ليلى عشان يشل شمسة ويوديها غرفته وأول ما شافها تخبل عليها وشلها بهدوء لأنها كانت راقدة.. ووداها غرفته ورقدها ع الشبرية وشغل البلاي ستيشن عشان يكمل لعب .. وعقب دقايق سمع تيلفونه يرن وشاف رقم مترف وحطه ع السبيكر عشان ما يخرب عليه اللعبة


مايد: " ألوو"


مترف: " افف ميود لا تحطني ع السبيكر !! ما احب.."


مايد: " انزين محد عندي هني.."


مترف: "حتى ولو ما احب.."


مايد:" تعرف انك سخيف؟ "


مترف: "جب"


وقف مايد اللعبة وشل التيلفون وبند السبيكر.. " شليت السبيكر.. نعم شو عندك؟"


مترف: " مليت من الدراسة.. وقلت بتصل اشوفك شو تسوي؟"


مايد: " انا مسويني babysitter اختي سارت المستشفى تشوف عمي وانا يالس هني ويا هالامورة شموس"


مترف: " عمك شحاله الحين؟ ان شالله احسن؟"


مايد: "والله حالته مستقرة مثل ما هو ما تغير .."


مترف: "ألله يشفيه ان شالله.. "


مايد: "امين الله يسمع منك.."


مترف:" ميود صور لي شمسة وطرش لي صورتها ع الام ام اس.. ابا اجوفها.."


مايد: " اسمح لي تبا تشوفها تعال العين .. ما نطرش صور بناتنا ع التيلفونات.."


مترف: "لا والله؟ عيل يوم انه كل شي عندكم عيب ما ينفع اخبرك .."


مايد: "تخبرني عن شو؟"


مترف: " عن البرنامج اللي قلت لك عنه.."


مايد: "اللي تبا أمولة تقدمه؟ مترف تخبلت؟ هاي ياهل وين بتعرف تقدم برنامج؟"


مترف: "ما بتكون بروحها.. أنا بكون وياها وبنتين اكبر عنها بشوي.. يعني دورها بيكون بسيط.."


مايد: "لا توهقني وياها منو متفيج يوديها دبي كل يوم؟ "


مترف: "ياللا عاد هالبرنامج بيكون في الصيف يعني ترومون تيلسون في فيلا عمك عبدالله اللي في جميرا.."


مايد: " ما ادري والله لازم ارمس ليلى وبشوف اذا طاعت برد لك خبر.."


مترف: "ان شالله توافق والله ميود خاطري اتمون الصيف بطوله هني.."


مايد: " ليش ما بتسافرون؟"


مترف: " لا وين نسافر.. اختي بتعرس هالصيف وكلهم مشتطين .. محد ياب طاري السفر"


مايد: " نحن بعد شكلنا ما بنسافر.. اذا قام عمي عبدالله بالسلامة يمكن نفكر بالسفر بس بعد احسهم مب متشجعين.. المهم انته شخبارك؟ "


مترف: " ملان والله كله يالس في البيت.. ويوم الخميس والجمعة اسير التلفزيون عشان البرنامج.."


مايد (بخبث): " والمعجبات؟"


مترف: "بلاهن؟"


مايد:" ما ادري .. انته خبرني.."


مترف: " هههههه والله البنات مشاكل.. وحدة في التلفزيون تخبرني انها كانت في حفلة عيد ميلاد وسمعت وحدة من البنات تقول انها تعرفني واني احبها .. "


مايد: " هههههههه يا عمي منو قدك؟ بعدك 16 سنة وعندك معجبات من كل أرجاء الدولة.. "


مترف: " خلهن يولن والله مب متفيج للبنات انا.."


مايد: "ما فكرت تتعرف على وحدة فيهن؟ جي يعني تجرب بس .."


مترف: " لاحظت انك ثاني مرة تسألني هالسؤال؟"


مايد: "كيفي ابا اشوف تفكيرك تغير في هالفترة ولا لاء.."


مترف: " اممم.. فكرت.. بس كل ما ابا اسوي هالشي اغير رايي.. "


مايد: " ليش؟"


مترف: " إذا بتعرف على وحدة لازم اعطيها وايد من وقتي ومشاعري.. هذا غير السهر ع التيلفون ولا المسنجر وياها. وغير الدلع والزعل وأنا اعرف عمري بمل منها بسرعة.. واذا حبيتها لا سمح الله .. بتم طول عمري متحسر وانا اتذكرها لأني اعرف انه اهليه ما بيختارون لي الا اللي في بالهم هم.. فليش اظلم عمري واظلمها ويايه؟ "


مايد: "عثرة!! كل هذا فكرت به؟؟؟ مترف حبيبي انته بعدك صغير.. مراهق.. عيش حياتك!!"


مترف: "وليش ما تعيش حياتك انته؟ ما اجوفك تعرفت على حد.."


مايد:" امممم.. ما لقيت اللي ممكن انها تجذبني هالكثر.."


مترف:" ولا وحدة؟"


مايد: "امبلى بصراحة في وحدة وايد عايبتني.. بس .. لأنها عايبتني مستحيل اتقرب منها.."


مترف:" غريبة .. ليش؟"


مايد: " دوم جي يوم حد يعيبني.. واتقرب منه.. أحس انه سخيف واني كنت ماخذ عنه فكرة احسن من اللي اشوفه جدامي.. وفي النهاية ابتعد عنه.."


مترف: " والهبنية من اهلكم؟"


مايد: "لا .. أقول مترف برد ادق لك اوكىعندي خط.."


مترف: "زين اترياك.. "


مايد: " باي.."


بند مايد عن مترف ورد ع الخط الثاني.. كان رقم غريب أول مرة يشوفه..


مايد: "ألو؟؟ .. "


: .............


مايد: "ألو!"


: ..............


اطالع مايد التيلفون باستغراب وبنده ورد يتصل بمترف عشان يكمل سوالف وياه



وعلى الطرف الثاني كانت عليا يالسة على شبريتها وتحس بقلبها بينفجر من كثر ما كان يدق بقوة.. رقم مايد يابته من موبايل مزنة يوم كانت في بيت يدوتها .. والرقم تم عندها طول هالفترة بس ما تجرأت انها تتصل به ، ما كانت تعرف شو تقول له ، كل اللي كانت تعرفه هو انها كانت تبا تسمع صوته.. تباه يحس فيها بأي طريقة.. وهاي هي الطريقة الوحيدة اللي خطرت على بالها.. بس يوم دقت له ورد عليها.. تيبست في مكانها وما رامت تبطل حلجها ولا حتى تتنفس..


وبابتسامة خبث ردت عليا ادق الارقام مرة ثانية .. مب لازم تتكلم حاليا بس تبا تسمع صوته مرة ثانية


.

.


موزة كانت مشغلة الليت في الاستوديو الصغير اللي في الحديقة ويايبة ال table lamp ومقربتنه من اللوحة ومشغلتنه.. كانت وايد مندمجة في رسم شمسة بنت عبدالله وكل ما ترسم لمحة من ملامح ويهها تنغرم في هالياهل اكثر.. ماشالله عليها ملامح ويهها وايد حلوة وعيونها ناعسات ورموشها طوال.. واحلى شي فيها شفايفها الرقيقة الوردية.. ابتسمت موزة وهي ترسم الخط السفلي للشفايف وقالت بهمس: " فديتها!!"


حست بموبايلها يهز في مخبى البنطلون وطلعته وحست بألم في بطنها يوم شافت رقم ليلى.. بس تجاهلت هالاحساس وردت عليها بانشراح: " هلا والله"


ليلى: " اهلييين.. موزوه شحالج.؟"


موزة (وهي تحط الفرشاة على صوب وتمسح ويهها بالمنديل) : "الحمدلله حبيبتي .. انتي شحالج؟"


ليلى: "أنا بخير.. موزووه انا في المستشفى؟"


اطالعت موزة ساعتها .. كانت الساعة عشر ..وقالت باستغراب:" انتي مب قايلة بتسيرين المستشفى الساعة سبع؟"


ليلى: " هيه انا هني من الساعة سبع!!.. عمي عبدالله تحرك.."


وقفت موزة وهي تشهق .. وتمت ساكتة ثواني وعقب ضحكت بصوت عالي وقالت: " صدق؟ ؟؟ ياااااااي ليلوه ها احلى خبر سمعته هالسنة!!.. فديت روحج تستاهلين سلامته.."


ليلى: "الله يسلمج حبيبتي.. توها يدوه مروحة البيت هي وسارة ويابو ميود يتم ويا عمي .. وانا بلحقهم البيت عقب ساعتين جي.. بصراحة مب مرتاحة كل شوي ايون رياييل يزورونه وانا اضطر اطلع في الممر.. والحين ييتي على بالي واتصلت بج.. قلت لازم اخبرج.. ادريبج تحاتينه.."



موزة: "الا احاتيه !.. والله دوم افكر فيه وادعي له.. بخبر امايه ولطوف هن بعد كانن يحاتنه.."


ليلى: " خلاص حبيبتي خبريهم وانا بيلس عند عمي الحين.. وعقب برد اتصل بج.. وبخبرج منو كان هني.."


موزة: " منو؟؟"


ليلى: "عقب بخبرج.."


موزة: " لا لا لا .. الحين تقولين..!!"


ليلى: " ههههههه ياللقافة!!.. اممم منو تتوقعين؟"


موزة: "اففف ليلوه عن الحركات قولي عاد.."


ليلى (بهمس وكأنه حد بيسمعها): " مبارك!!!"


حست موزة ببرود مثل الثلج يسري في عروقها ويلست ع الكرسي وهي مغمظة عيونها وقالت: "مبارك؟"


ليلى: "هيييه.. كان هني يوم ييت انا وسارة عشان نشوف عميه وتم ويانا لين ما اطمن عليه وعقب روح ويا ابوج.."


موزة (بسخرية): " ما شالله كثرت الصدف اللي تجمعكم هاليومين.."


ليلى: "أنا بروحي مستغربة من هالشي.. واحد ما شفته في حياتي الا مرة وحدة.. بس في الفترة الاخيرة وين ما اسير احصله جدامي.."


موزة: "هممم.. فعلا شي غريب.."


ليلى: "المهم حبيبتي برمسج عقب.. سلمي على امج وعلى لطوف.."


موزة: "يبلغ ان شالله.. مع السلامة.."


ليلى: "فمان الله.."


بندت موزة موبايلها وتمت راصة عليه بقوة بإيدها.. شافت مبارك.. اليوم بعد شافته.. ليش تحس انه في شي يستوي من وراها وانه ليلى تخبي عنها شي كبير؟؟ ليكون بس؟؟ لا لا .. ليلى ما تسويها.. وبعدين ليلى تحب موزة وايد.. مستحيل تفكر تخونها.. عيل ليش هالاحساس بالخيانة اللي معذبنها وليش هالظنون اللي شلت تفكيرها؟


نشت موزة وطلعت من الاستوديو وهي بتموت من الغيرة وقالت لنفسها: "إحساسي عمره ما كان غلط.. في شي يستوي من ورايه.. وقلبي مب مطمن.. بس مهما كان هالشي.. ليلى مستحيل تاخذ مبارك مني.. مستحيل.."


مشت بسرعة للصالة ولو كانت المشاعر تتجسد بتكون موزة تجسيد للغضب والغيرة في هاللحظة..


وفي سيارته، كان مبارك.. مصدر غيرتها وغضبها لاهي تماما عنها ولا يعرف حتى بوجودها في هالدنيا.. كان تفكيرهكله منصب على شغله وشركة عبدالله.. وعلى ليلى اللي سلبت له قلبه وتفكيره.. استوى له ساعتين وهو يدور في الشوارع بموتره ويفكر فيها وفي ابتسامتها الخجولة يوم كان واقف وياها عند باب غرفة عبدالله.. ساعات يحس انه يخون عبدالله ويعض الإيد اللي انمدت له بمجرد تفكيره ببنت اخوه بهالطريقة.. بس ما بإيده حيلة.. هالشي كان خارج عن سيطرته.. معقولة يكون حبها؟؟
لف مبارك بموتره ودخل الفريج ومشى ببطء باتجاه بيتهم وهو يحاول يفهم مشاعره.. وفي الأخير يأس من هالشي وبركن سيارته في الكراج ودخل الصالة ولقاهم كلهم متيمعين هناك.. ظاعن ومرته وعيالهم وأمه وابوه.. وابتسم وهو يسلم عليهم وييلس وياهم وعلى طول ركضت مي صوبه ويلست على ريوله..
فاخرة: " ميوه نشي عن عمج.. خلاص كبرتي على هالسوالف.. بتذبحينه.."
مبارك (وهو يلوي على مي ): " خليها فديتها ما عندي حد ادلعه غيرها.. "
اطالعت مي امها بدلع وقالت: " أصلا عميه يمووت فيني"
مبارك : " فديت الواثقة.."
مي: " ويحبني وما يرفض لي طلب.."
مبارك: " أكييد"
مي: "وبيوديني وياه دبا يوم بيسير.."
ظاعن: "ههههههه اه ياللوتية.. بس لو احصل منج نص هالدلع اللي تدلعينه على عمج جان الحين بوديج دبا"
مبارك: " لا تحاول.. ميوه اصلا تحبني اكثر عنك.."
ظاعن: " صدق ميوه؟"
اطالعته مي واطالعت عمها وحاولت تحدد أولوياتها وبما انه عمها احلى عن ابوها بوايد وممكن يوديها دبا قررت انه هو اللي تحبه اكثر وأشرت عليه وهي تضحك وقالت: " احب عمي اكثر.."
ضحكوا كلهم عليها ومد ظاعن ايده عشان يزخها بس هي لوت على عمها ومبارك دافع عنها ويلسوا على هالحالة يضحكون شوي ويسولفون ومبارك يتخيل نفسه يالس وياهم هو وليلى.. ووياهم عيالهم اللي يشبهونه ويشبهونها.. كان هالحلم مستحيل ومحرم بالنسبة له قبل اشهر قليلة.. بس الحين يحس انه ممكن يتحقق.. ولازم يتحقق.. وتنهد بسعادة وهو يتذكر عيونها.. شو سويتي فيني يا ليلى؟؟
التفت مبارك وشاف امه تطالعه وفي عيونها نظرة غريبة وعلى شفايفها ابتسامة أغرب.. وقالت يوم شافته يطالعها: " عسى الله يوفقك ويعطيك على قد نيتك فديتك.."
فاخرة وهي تبتسم نفس ابتسامه امه الخبيثة: "آمين"
استغرب مبارك.. شو هالابتسامة..؟؟ معقولة حسوا باللي يدور في بالي؟ لا لا ما اعتقد..
بس يوم رد يطالع امه كانت بعدها تطالعه وتبتسم وهني تأكد مبارك انه شفاف جدا وانه امه فاهمة السالفة كلها.. وابتسم وهو يكتم ضحكته ورد يطالع اخوه ويحاول يستوعب اللي كان يقول له اياه
.
.


.
.
كانت سلامة يايه اطل على بنتها لطيفة اللي حابسة عمرها في غرفتها اربعة وعشرين ساعة ومجابلة كمبيوترها.. ويوم دخلت الغرفة وشافتها بمنتهى الفوضى.. قررت تسوي في بنتها معروف وترتبها.. ولطيفة يوم شافت امها ترتب فراشها، انحرجت وقامت ترتب وياها..
سلامة: " ليش ما تخلين كارين تنظف لج الغرفة؟"
لطيفة: "مابا.. اجزء منها ما باها تلمس اغراضي.."
سلامة: "عيل رتبيها انتي تعرفيني ما اداني جي.."
لطيفة: "ان شالله امايه من عيوني.."
تنهدت سلامة وهي ادخل كومة القمصان اللي ع الارض في الكبت.. وسألت بنتها: " متى بتشبعين من مجابل هالكمبيوتر؟ تولهنا عليج .. أبوج نسى انه عنده بنتين.. ما قام يسأل الا عن موزة.."
لطيفة (وهي تضحك وتلقط الكلينكس والاوراق المفرورة على الارض وتحطهن في الزبالة): " افاااااا.. خلاص انا زعلت عليه.. وعقب يوم بشوفه بعد ما برمسه.."
سلامة: " صدق شو محصلة في هالكمبيوتر وعايبنج هالكثر..؟"
لطيفة: "امممم.. أقول لج بس ما تزعلين؟"
سلامة: " وليش ازعل؟ انتي مسوية شي يزعل؟"
لطيفة: " لا طبعا..!! امايه انا ارمس ربيعاتي في المسنجر.. هذا أول شي.."
سلامة : "ترمسينهم في شو؟"
لطيفة: "المسنجر.. هذا شرات التيلفون.. بس بدل لا نرمس.. نكتب اللي نبا نقوله.."
سلامة: "وليش عاد هالعبالة؟ اتصلي بهن وسولفي وياهن.."
لطيفة: " ههههههه امايه مب كلهن يعرفن رقم تيلفوني.. ربيعاتي اللي في المسنجر من قطر والسعودية والكويت.. وشي منهن من الامارات الشمالية .. إذا عطيتهن كلهن رقم تيلفوني ما بلحق ع الاتصالات.."
سلامة: " ماشالله ومن وين عرفتيهن هاذيلا كلهن..؟؟"
لطيفة: " نحن نتيمع كلنا في مكان يسمونه المنتدى.. أوكى؟"
ابتسمت سلامة وهي تيلس ع الكرسي وتسمع بنتها تهذرب وقالت: "أوكييه"
لطيفة: " هالمنتدى انا مثلا اكتب فيه شعر ولا قصة وهالبنات يردن عليه..ومن هني نعرف بعض.."
سلامة: "يعني انتي مب شايفتنهن؟"
لطيفة: "ااممم لاء.."
سلامة: "ولا سامعة صوتهن؟"
لطيفة: " لا لأنه ما عندي مايك.."
سلامة: "شو هذا؟"
لطيفة: " اللي يرمسون به من الكمبيوتر.."
سلامة: " انزين عيل يوم انج لا شفتيهن ولا سمعتي صوتهن.. شو دراج انهن بنات؟؟"
لطيفة: "والله عاد هذا شي راجع لهن.. ولا تحاتين امايه انا ما اوثق بأي حد.. وبعدين ما اعطيهن أي معلومات عني.. مجرد صداقة سطحية وبحدود.."
سلامة: " هممم!.. تحملي ترى البنات هاليومين مب شرات قبل.. "
لطيفة: " أفا عليج يا اميه .. أنا تربيتج !"
سلامة: " فديت روحج.. ياللا غناتي انا بنزل اجوف ابوج وانتي انزلي وايلسي ويانا شوي.."
لطيفة: "ان شالله امايه.. دقايق بس وبنزل لكم.."
طلعت سلامة من عند غرفة لطيفة وهي تبتسم وتدعي لها انه الله يهديها ويوفقها .. واصطدمت بموزة اللي كانت تمشي بسرعة وويهها معتفس.. وموزة يوم انتبهت لأمها قالت: " سوري امايه ما شفتج.."
سلامة: " شو فيج مواز؟"
موزة (وهي تصد بويهها الصوب الثاني وتمشي بسرعة لغرفتها): " ما فيني شي امايه.. "
استغربت سلامة وتمت واقفة في الممر تطالع باب غرفة بنتها العودة .. أول مرة تشوفها متظايجة جي.. موزة من النوع الهادي والبارد تقريبا.. مشاعرها دايما محبوسة في داخلها ومستحيل اطلعها جدامهم..
مشت سلامة صوب الدري وهي تفكر بهالشي.. ويوم نزلت وشافت سهيل في الصالة يالس يترياها وهو يبتسم.. نست موزة وافكارها وابتسمت لريلها اللي من تشوفه تنسى الدنيا وهمومها كلها..

.


في السيارة، في طريقها للبيت.. كانت ليلى ساكتة وعلى شفايفها ابتسامة هادية.. اشفاق مودنها البيت ومايد تم ويا عمها وبيبات عنده لأنه أم أحمد ما طاعت تخلي ليلى تبات هناك..


كانت تطالع الشارع من الجامة وتفكر بكل اللي استوى اليوم.. وموقفها ويا مبارك هو اكثر شي كان شاغل بالها الحين.. صحيح انه عمها مستحوذ على تفكيرها بس من اللحظة اللي طلعت فيها من المستشفى وركبت السيارة وهي مب قادرة تشل صورة مبارك من بالها.. كانت حاسة انها متلخبطة.. تصرفه وياها اليوم.. واللحظات اللي شاركها فرحتها فيها.. خلتها تحس انها قريبة منه.. لثواني بسيطة.. حست انها دخلت لأعماق روحه وانها شافت في عيونه صورة لإنسان ثاني.. انسان غير تماما عن مبارك اللي كانت تسمع عنه.. ليش تحس انها كانت فاهمتنه غلط؟ وانه ورا قناع القوة والكبرياء اللي لابسنه نهر من الحنان والمشاعر الرقيقة.. اليوم شافت الجانب الإنساني في شخصية مبارك وعيبها هالجانب وايد.. وغصبا عنها يلست تستعيد ابتسامته لسارة في مخيلتها .. هالابتسامة اللي فاجئتها وانرسمت في بالها على طول..



رن موبايل ليلى فجأة وانتفضت من أفكارها وهي تتخيل انه موزة المتصلة فيها الحين!.. بس يوم شافت الرقم كانت فواغي بنت خالوتها..وتنفست بعمق وهي تحس بخليط من المشاعر المتناقضة في داخلها.. احساس رهيب بالخيانة غمر ليلى وهي تتذكر ربيعتها.. اللي يت في بالها في هاللحظة وكأنها تذكرها بحبها لمبارك.. وكأنها تذكرها انها المفروض ما تفكر فيه أبد.. وانه افكارها هاي كلها غلط في غلط..


تنفست ليلى بصعوبة وهي ترد الموبايل في الشنطة بدون ما ترد على فواغي.. كانت مب قادرة ترد عليها ولا تكلمها.. كانت مشاعرها مهتزة بشكل كبير.. وحاسة بالذنب..كيف قدرت تفكر بمبارك بهالطريقة؟ كيف قدرت تخون ثقة موزة فيها؟ كيف؟



يوم وصلت ليلى البيت دخلت للصالة المظلمة تقريبا وفصخت شيلتها ويودتها في إيدها وهي تمشي ببطء باتجاه يدوتها اللي كانت يالسة ع القنفة وشمسة في حظنها.. شمسة كانت تصيح وأم أحمد تحاول تهديها وتباها ترضع بس شمسة مب طايعة.. اطالعتها ليلى بحزن وتذكرت عمها يوم يقول لها " لا تخلون شمسة تصيح" وشلتها عن يدوتها وعلى طول سكتت شمسة في حظن ليلى..


ابتسمت أم أحمد وقالت: " فديتها تعودت عليج.."


ليلى: "هيه .. وانا بعد وايد تعودت عليها.."


أم أحمد: " شحاله عمج؟"


ليلى: " بعده ما تحرك.. بس الدكتور وايد متفائل.."


أم احمد: " ادعيله يا ليلى.. "


ليلى: " في كل ثانية ادعيله.. الله يعافيه ويقوم بالسلامة ان شالله.. ويرد لنا"


ابتسمت لها ام احمد وقالت لها تصبحين على خير وسارت غرفتها عشان ترقد.. وتمت ليلى في الصالة تمشى بشمسة عشان ترقدها ..


ما تعرف ليش نزلت دمعتها في هاللحظة.. ما تعرف شو مصدرها بالضبط.. أو كانت تعرف وتجاهلت السبب..


المهم انها نزلت.. وكانت الأولى اللي فجرت بحور الدموع في جفونها هالليلة..


كانت تصيح حبها اللي مات في ليلة قاسية وحارة من ليالي الصيف.. تصيح ماضيها اللي صاحته الف مرة من قبل.. ومستقبلها البارد الخالي من الحب.. تصيح حياتها اللي بتمر جدام عيونها وهي محرومة من كلمة " أحبج" .. أي حياة هاي اللي تنتظرها.؟؟ بنت في بداية العشرينات.. أم لخمسة اطفال .. في يوم من الايام كلهم بيكبرون وبيودرونها وبتم هي وحيدة..


هالشي يرعبها فوق حدود الرعب.. وكل ما تفكر به تحس بإحساس بارد يسري في عروقها.. روتين حياتها يرعبها.. الملل والأيام اللي تمر عليها وهي ما تميز من بينهن.. بعد يرعبها..


تنهدت ليلى بحزن وباست شمسة بحنان يوم شافتها راقدة.. وطفت ليتات الصالة وركبت فوق عشان ترقد هي وشموس


.


.


في غرفة عبدالله ، كان مايد منمدج في قراءة القرآن بصوت عالي ورائع.. وعبدالله استوى له دقيقة وهو مبطل عيونه ويطالعه بس مايد مب منتبه عليه.. يوم فتح عبدالله عيونه كان أول شخص شافه جدامه هو مايد.. وتم يطالعه بحيرة وهو يتحراه اخوه احمد الله يرحمه.. حاول عبدالله يتكلم بس كان حاس بتعب كبير.. وكأنه نسى كيف يحرك عضلات جسمه.. الشي الوحيد اللي رام يحركه للحين هن عيونه.. وعيونه كانت مركزة على مايد..


أفكار عبدالله كانت كلها متلخبطة.. اضاءة الغرفة رغم انها مب وايد قوية بس أذت له عيونه.. وكان كل شوي يرمش عشان يخفف من حدتها.. كان صدق مصدوم .. ما يعرف هو وين.. وشو يسوي هني؟.. وليش اخوه احمد رد صغير جي؟ هذا اكثر شي كان محيرنه!!.. هذا اللي يالس جدامه يقرا قرآن هو أحمد اخوه.. بس يوم كان بعده صبي.. غمض عبدالله عيونه بتعب وبصعوبة رد يبطلها مرة ثانية..


وشوي شوي .. بدت تهاجمه الذكريات وحدة ورا الثانية..وتدفعه بكل قوة للزمن الحاضر..


زواج أحمد وجلثم.. عيالهم.. الحادث.. امه وهي تصيح في العزا.. ياسمين.. وطفلة صغيرة للحين يتهيأ له انه يشم ريحتها الحلوة .. ياسمين.. مرته.. وابوها.. وشكل ياسمين وهي تزاعج عليه وتعطيه بنته..


يتذكر انه كان واقف في بيت اخوه.. وهذا.. هذا مب أحمد.. هذا ولده مايد..


بطل عبدالله حلجه وبصوت خافت ويرتجف من ورا الاكسجين قال: " مايد؟"



رفع مايد راسه عن المصحف والتفت بسرعة لعمه.. كان الصوت خفيف وايد وما يعرف مايد اذا صدق سمعه ولا لاء.. بس يوم شاف عيون عمه العسلية تطالعه شهق وانترست عيوونه دموع وتم يالس مكانه وهو يطالعه ومب مصدق انه اللي يشوفه جدامه حقيقة .. رغم انه يوم يا هني ويلس ويا عمه كان متوقع انه ينش في أي لحظة .. بس الحين يوم استوى هالشي جدامه كان مايد مب قادر يتحرك من مكانه.. ومب قادر حتى يتكلم.. ويوم خفت صدمته فز من مكانه وهوى على عمه يبوس ويهه وإيده ويصيح بقوة من الفرحة.. وعبدالله ابتسم له بتعب كبير خلت مايد ينتبه لنفسه وركض بسرعة برى عشان ينادي النيرس او الدكتور أو أي حد يشوفه جدامه..


خلاص المأساة انتهت.. والأزمة عدت على خير


خلاص عمه عبدالله اخيرا رد لهم..


أخيرا!!




مر أسبوع



خلال هالاسبوع، استعاد عبدالله وعيه تماما وخلال اقامته في المستشفى في فترة النقاهة كانت غرفته دوم مزدحمة بالزوار من الاهل والمعارف ورجال الاعمال اللي يحترمون عبدالله وتربطهم وياه علاقات عمل وصداقة.. الجرايد المحلية كلها انترست من التهاني ولمدة اسبوع كامل.. وعبدالله خلال هالفترة استعاد ذاكرته وريح بال اهله لأنه نجى من احتمالية الشلل واعلن لهم الدكتور انه صحته تمام.. الكل كان مستانس انه عبدالله رد لهم.. واللي فاجئ الكل انه صالحة كانت اكثر وحدة يلست وياه.. أكثر حتى عن أم أحمد..وما كانت تطلع عنه الا يوم يدشون الرياييل عنده..


محمد ومريم ردوا من السفر ومريم على طول اتأقلمت ويا الوضع اليديد واندمجت ويا الكل في البيت وخصوصا ويا سارة ومايد اللي من أيام إيطاليا وهي متخبلة عليهم.. ومحمد ارتاح انه مرته مستانسة ويا اهله ورد يلتفت لشغله ومحلاته ومطاعمه شوي.. وأكيد ما نسى مبارك والشركة وفي ثاني يوم له في البلاد سار الشركة عشان يشرف على الشغل ويا مبارك.. ومبارك كان يعرف انه محمد ما يدانيه.. هالشي كان واضح جدا من طريقة معاملته له .. بس ما اهتم وحاول قد ما يقدر انه يساعد محمد ويعلمه الشغل..






في عالم ثاني من صنع الإنسان نفسه.. وفي منتصف خيوط الشبكة العنكبوتية.. كانت لطيفة تعيش ويا حلمها اليديد.. لطيفة صارت ادش البوول بشكل يومي وتيلس تلعب ويا مانع بالساعات وتسولف وياه وهي تتحراه مايد وكانت وايد مستانسة بهالوضع بس للحين ما خبرته هي منو أو شو تبا منه بالضبط.. سوالفهم كانت جدا عادية وما تتعدى اهتماماتهم وهوياتاهم ودراستهم وبس.. رغم هذا كانت لطيفة تحس انه في كل مرة تشوفه اون لاين وتسولف وياه يزيد حبها له ويكبر في عينها أكثر.. وتتمنى لو تقدر تعرفه اكثر واكثر..
موزة حاولت تتجاهل مشاعر الغيرة اللي ابتدت تنمو في داخلها وردت لزياراتها اليومية لليلى وعطتها اللوحة اللي رسمتها عشان تعطيها لعمها يوم بيرد البيت وليلى احساسها بالذنب تلاشى تقريبا لأنها قررت ما تفكر بمبارك نهائيا.. ورغم صعوبة هالشي قررت انها لازم تتحكم بمشاعرها.. عشانها وعشان ربيعتها
.
.



.


يوم السبت الصبح، كان محمد ساير ويا مبارك موقع البناء عشان يشوف شو استوى على مشروع عمه عبدالله اليديد.. مبارك كان يعرف انه محمد ياي هني وهو يدور عليه ولو غلطة وحدة بس.. عشان يطلع كل اللي في خاطره .. بس مبارك كالعادة تجاهل وسوى عمره ما يعرف شي ويابه وياه هني في موقع بناء العمارة ويوم نزلوا من موتر مبارك شاف محمد انه العمال بعدهم في البداية ومثبتين عواميد الحديد اللي تشكل هيكل البناء في الارض المحفورة بعمق .. اكوام الاسمنت والطابوق والخرسانة كانت في كل مكان والعمال فوق الخمسين شخص موزعين على كامل الموقع والمهندسين يالسين في الصندقة اللي على صوب يقرون الخرايط ..واحد من المهندسين يوم شاف مبارك طلع من مكانه ويا صوبه هو ومحمد عشان يسلم عليهم..


المهندس: " السلام عليكو .."


مبارك (وهو يمد ايده ويسلم عليه): " وعليكم السلام والرحمة.. شحالك يا حسام"


المهندس: "الحمدلله ازيك انته.."


مبارك: " بخير ربي يعافيك.."


سلم المهندس على محمد اللي كان يتفقد كل شي حواليه وعقب التفت لمبارك وقال


المهندس: " واستاز عبدالله ازيه دلوأتي..؟ والله كنت هروح له المستشفى امس بس ما أدرش أسيب العمال هنا لوحديهم.."


مبارك: " عبدالله الحمدلله الحين وايد احسن عن قبل وان شالله الاسبوع الياي بتشوفونه وياكم هني.. هذا محمد ولد اخوه ياي يشوف شو سويتوا للحين.."


المهندس: " يا أهلا وسهلا.. تفضلوا معايه وشوفوا بنفسكم .."


مشى مبارك ومحمد ويا المهندس واقتربوا من العواميد الحديدية المثبتة في الارض ويلس المهندس يشرح لهم ليش حفروا الارض بهالعمق وانهم بيسوون باركنات تحت البناية بدل لا تاخذ مساحة من المكان الخارجي..


محمد: "انزين وليش يايبين الخرسانة الجاهزة؟؟ مب احسن البنيان كله يكون طابوق؟؟"


المهندس: " أكيد احسن بس كل المباني دلوأتي بتستخدم الخرسانة.. أسرع وأنظف للبيئة وأرخص.."


محمد (وهو يطالع مبارك): " عمي عبدالله يعرف عن هالشي؟"


مبارك: " أنا ما تعاملت في هالمشروع الا ويا الشركات اللي يتعامل وياها عمك.."


محمد: " وشحنات الاسمنت وكل شي مسجل طبعا وفواتيره في المكتب؟"


مبارك (ببرود): " أكيد"


محمد (للمهندس): " هممم.. ومتى بتسلمون المشروع للعميل؟"


المهندس: "إحنا لسا في أول المشوار.. البناية دي مش حتجهز إلا بعد 3 أشهر.."


كان محمد مندمج في حواره ويا المهندس وفي هاللحظة كانت وحدة من الرافعات ترفع عواميد الحديد للعمال اللي فوق والعمال ينزلونها منها ويثبتون العواميد في هيكل الطابق الأول.. بس بينما واحد من العمال ينزل العواميد من الرافعة .. طاحت وحدة من الحدايد عنه وكانت متجهة لراس محمد بالضبط.. ورغم صرخة الهندي اللي حاول يحذرهم الا انه محمد ما انتبه للخطر المتجه له واللي في أي لحظة بيشق راسه نصين..



لولا انه مبارك كان أسرع عنها ودزه بعيد وظربته الحديده هو في إيده وابتدا الدم يصب منها بغزارة.. محمد عصب يوم دزه مبارك وكان مب مستوعب اللي يستوي.. وتوه بيلف عشان يهزبه يوم شاف الدم يصب من إيده..




المهندس والعمال كلهم اجتمعوا يشوفون شو استوى بإيد مبارك ومحمد واقف مذهول بعده من الصدمة ومن واقع انه كان بيموت وانه مبارك هو اللي انقذ حياته من الموت.. مبارك كان يلف إيده بغترته وملامح الألم مرسومة بعمق على ويهه والمهندس كان محتشر ويزقر على أي حد عشان يجهز السيارة ويودونه المستشفى.. وهني تحرك محمد وسار صوبه وقال لهم..: " أنا بوديه المستشفى .. خلاص حصل خير.. ردوا شوفوا شغلكم.."
اطالعه مبارك بنظرة ما فهمها محمد ومشوا اثنيناتهم للسيارة ومحمد كل شوي يطالع مبارك وكان مبين انه راص على أسنانه بقوة عشان يمنع أي صرخة ممكن تطلع منه بسبب الألم اللي يحس به..
وداه محمد الطوارئ ويلس وياه لين ما خاطوه له الجرح اللي في ايده ولفوا له اياها وخبرهم الدكتور انه رغم انتفاخ ايده الفظيع ماشي كسور بس بعد لازم مبارك يريح ايده ويبتعد عن السواقة نهائيا.. بس منو بيقنع مبارك؟ أول ما طلعوا اثنيناتهم من الطوارئ التفت على محمد وقال له: " بردك الشركة وبروح انا البيت ابدل ثيابي .. كندورتي خايسة دم.."
محمد: " انا بوصلك البيت وبتصل بربيعي يوديني الشركة.."
مبارك: " ليش عاد؟ لا تعبل عليه.. انا بوصلك الشركة.."
محمد: " بس الدكتور قال لك لا تسوق.."
مبارك: " ومن متى انا اسمع رمستهم هاذيلا؟ "
محمد: "انزين ع الاقل خلني اسوق انا للشركة وعقب جان ناوي تذبح روحك الله وياك.."
ضحك مبارك وابتسم محمد وهو يركب الموتر وياه .. رغم انه ما شكره بس مبارك كان يعرف انه محمد متلوم وايد فيه.. ورغم الالم اللي يحس به مبارك للحين في ايده بس بعد كان مستانس انه اخيرا قدر يكسب ولو شوي من محبة محمد واحترامه.. في النهاية اذا كان ناوي يخطب ليلى، لازم يكسب ثقة محمد..
انتبه مبارك لأفكاره واتفاجئ بها!
يخطب ليلى؟ من وين يت هالفكرة؟
ابتسم مبارك لنفسه وهو يطالع محمد بطرف عينه وقال في خاطره.. ليش لاء؟ وانا وين بحصل احسن عنها؟
.
.